"Şah ölüm" filminin ssenari müəllifi: "Bu, mənim üçün klassika idi"
Bu çəkiliş mənim üçün bir klassika oldu. Çünki burada təkcə yaradıcı heyətin zəhməti yox, həm də böyük bir sevgi vardı. Hər kadr, hər məqam mənim üçün çox doğmadır.
Bu sözləri bu gün ParkCinemada Azərbaycanın görkəmli tarixi şəxsiyyətlərindən biri, mərdliyi və xeyirxahlığı ilə tanınan Məcid ağa Şəkibəyovun ömür yoluna həsr olunmuş “Şah ölüm” filminin təqdimatı zamanı filmin baş rol ifaçısı və ssenari müəllifi Zəka Vilayətoğlu Crossmedia.az-a açıqlamasında bildirib.
O, filmin ərsəyə gəlməsində əsas məqsədin gənclərimizin qəhrəmanlarımızı tanıtmaq olduğunu qeyd edib:
"Bizim üçün ən böyük şans isə Tanrının yaratdığı şərait oldu. Çəkilişlər həm bağlarda, həm də çətin relyefli yerlərdə aparıldı. Hava bəzən yağışlı, bəzən dumanlı olsa da, bu, filmin ovqatına xüsusi gözəllik qatdı. Qəhrəmanımızın obrazını dağlarda, mağaralarda, təbiətin qoynunda canlandırmaq çox çətin, eyni zamanda, çox təsirli idi. Həmin anları xatırlayanda bu gün də qəlbimdə xoş bir həyəcan yaranır.
İnsan istədiyi məqsədə çatmaq üçün yorulmağı bacarmalıdır. Əziyyət olmadan böyük işlər ərsəyə gəlmir. Şükürlər olsun ki, illər əvvəl — 2001-ci ildə yazdığımız və sonradan dəfələrlə nəşr olunan “Şah Ölüm” romanı bu gün artıq ekran həyatı yaşayır. Bu, təkcə ədəbiyyatımızın deyil, həm də milli yaddaşımızın zənginləşməsidir.
Biz çalışırıq ki, gələcək nəsillərə çatdıraq: bu xalqın necə qəhrəman övladları olub, necə mərd mübarizələr aparılıb. Bir qarış torpaq uğrunda belə canından keçməkdən çəkinməyən igidlərimiz olub".
Ssenari müəllifi, həmçinin o vaxtdan bəri formalaşmış bəzi fikirlərə də öz münasibətini bildirib: "Bəzən deyirlər ki, əgər Məcid Ağa təslim olsaydı, bəlkə, indi sağ idi. Amma əslində o, yazıçı kimi də, insan kimi də ölməzliyini qazandı. Onun adı, onun mübarizəsi Azərbaycan tarixində əbədi qalacaq. İnanıram ki, gələcəkdə də belə əsərlər, belə filmlər olacaq. Mən bütün yaradıcı heyətə təşəkkür edirəm, hər birinizə uğurlar arzulayıram" - deyə o əlavə edib.
Elmir Heydərli
22:03 11.09.2025
Oxunuş sayı: 14046
