Avropa Komissiyası Rusiyanın dondurulmuş aktivlərindən Ukraynanın bərpası üçün istifadə planı hazırlayır
Avropa İttifaqı Ukraynanın müharibədən sonrakı bərpası üçün Rusiyanın dondurulmuş aktivlərindən gəlirlərin istifadəsi ilə bağlı yeni mexanizm üzərində işləyir.
Crossmedia.az xarici mediaya istinadən bildirir ki, sözügedən mexanizm aktivlərin birbaşa müsadirəsini nəzərdə tutmur. Çünki Avropa ölkələrinin bir çoxu hesab edir ki, bu addım hüquqi və maliyyə baxımından ciddi problemlər yarada bilər. Ona görə də Avropa Komissiyasının hüquqşünasları yeni xüsusi fondun yaradılmasını təklif ediblər. Bu fonda yalnız Aİ üzvləri deyil, həmçinin Böyük Britaniya və Kanada da dondurulmuş aktivlərdən əldə edilən gəlirləri yönləndirə biləcək. Bu yolla, məsələyə davamlı olaraq veto qoyan Macarıstanın təsir imkanları da azaldılmış olacaq.
Məsələ ilə bağlı son müzakirələrin isə avqustun 30-da baş tutacağı gözlənilir. Həmin gün Aİ-yə üzv 27 ölkənin xarici işlər nazirləri Kopenhagendə qeyri-rəsmi görüş keçirəcəklər.
22:05 29.08.2025
Oxunuş sayı: 5719
