Hakan Fidan: İsraillə iqtisadi və ticarət əlaqələrini kəsirik
Türkiyə İsraillə bütün iqtisadi və ticarət əlaqələrini kəsir və öz hava məkanını İsrail təyyarələri üçün bağlayır.
Crossmedia.az "Anadolu" agentliyinə istinadən xəbər verir ki, bu barədə Türkiyənin xarici işlər naziri Hakan Fidan Türkiyə parlamentində Qəzza zolağındakı vəziyyətə həsr olunmuş fövqəladə iclas zamanı bəyan edib.
"İki ildir ki, İsrail Qəzzada soyqırım törədir və bütün dünyanın gözü qarşısında əsas insani dəyərləri tapdalayır. Biz fələstinli xalqın Qəzzadan deportasiyasını nəzərdə tutan plana qarşıyıq. Bu planı kim təqdim edirsə etsin, bizim üçün o qüvvədə deyil", – deyə Fidan bildirib.
Onun sözlərinə görə, Ankara İsrailin BMT Baş Assambleyasının fəaliyyətində iştirakının tamamilə dayandırılması üçün həmfikir ölkələrlə birgə çalışmaqda davam edəcək.
"Qərb ölkələrində İsrailin törətdiyi soyqırıma qarşı ictimai narazılıq artır. Hökumətlər bunu daha görməzlikdən gələ bilməyəcəklərini bildirirlər. Bu reaksiyanın daha kollektiv xarakter alması olduqca vacibdir. Bu kontekstdə biz İsraillə ticarətin dayandırılması, BMT Assambleyasında iştirakının tam şəkildə dayandırılması, həmçinin İsrailə silah və sursat tədarükünün kəsilməsi üçün həmfikir ölkələrlə birgə addımlar atmağa davam edəcəyik", – deyə nazir vurğulayıb.
Fidan qeyd edib ki, "Türkiyənin səyləri nəticəsində əvvəllər İsraili dəstəkləyən ölkələr belə, artıq Fələstin və İsrailin iki dövlət əsasında birgə mövcudluğu ideyasını dəstəkləməyə başlayıblar".
"Böyük Britaniya, Fransa, Kanada, Malta, Yeni Zelandiya, Portuqaliya və Avstraliya kimi ölkələr Fələstin Dövlətini tanımaq niyyətlərini açıqlayıblar. Bu, Fələstin məsələsi kontekstində beynəlxalq diplomatiyada tarixi dönüş nöqtəsidir", – deyə nazir əlavə edib.
Fidan bildirib ki, Türkiyənin diplomatik səyləri iki əsas istiqamətə yönəlib: "Birincisi, davam edən soyqırım və müharibənin dərhal dayandırılması və humanitar yardımın təcili çatdırılmasıdır."
"İkinci istiqamət – iki dövlətli həllin gündəmdə saxlanılması və onun beynəlxalq səviyyədə tanınmasına nail olmaqdır. Əgər İsrail beynəlxalq hüququ saymadan Fələstində sərt siyasətini davam etdirərsə, bu, şübhəsiz ki, regional və qlobal nəticələrə səbəb olacaq. Buna görə də biz bölgəmizdə gərginliyin azaldılması və sülh təşəbbüslərinin irəlilədilməsi üçün aparıcı oyunçularla təmaslarımızı davam etdirəcəyik", – deyə Fidan vurğulayıb.
Nazir həmçinin qeyd edib: "Biz Suriyanın qədim və dəyərli icmalarının bu pozucu (ərazi bütövlüyünə zidd olan) məqsədlər üçün istifadə olunmasına imkan verməyəcəyik."
Səbiyyə Zayirova
17:28 29.08.2025
Oxunuş sayı: 5020
