Azərbaycan Kinematoqrafçılar İttifaqı ənənəvi mükafatın builki qaliblərini elan edib
Azərbaycan Kinematoqrafçılar İttifaqı (AKİ)
kino xadimlərinin peşə bayramı olan 2 Avqust – Azərbaycan Kinosu Günü münasibətilə
mükafatlandırdığı kinematoqrafçıların builki siyahısını açıqlayıb.
Crossmedia.az xəbər verir ki, bu barədə Azərbaycan
Kinematoqrafçılar İttifaqı məlumat yayıb.
İttifaqının katibliyinin qərarına əsasən,
2025-ci il üçün AKİ-nin ənənəvi mükafatına Pərviz Həsənov “Başlıbel – bir kəndin
mühasirə gündəliyi” tammetrajlı sənədli filminin uğurlu rejissor həllinə görə,
Daniel Quliyev “Kinomexanikin qayıdışı” və “Tənha insanın monoloqu” filmlərinin
uğurlu vizual həllinə görə, Səbuhi Atababayev “Tağıyev: Neft” və “Bəlkə də”
tammetrajlı bədii filmlərində uğurlu rəssam işinə görə və Fehruz Şamıyev Beynəlxalq
film festivallarının təşkili, kinematoqrafiyamızın beynəlxalq əlaqələrinin
inkişafında xidmətlərinə görə layiq görülüblər.
Xatırladaq ki, AKİ-nin mükafatı hər il milli
kinematoqrafiyanın inkişafında xidmətləri ilə fərqlənmiş yaradıcı şəxslərə
ünvanlanır. Mükafatı təsis etməkdə məqsəd, milli kinoda müsbət tendensiyaları
diqqət mərkəzinə gətirməkdir. Nominantların seçimini apararkən İttifaqın
katibliyi ötən kino mövsümü ərzində gedən prosesi diqqətlə müşahidə və təhlil
edir, kinematoqrafiyanın müxtəlif sahələrindəki xidmətləri qeyd edir və açıq səsvermə
yolu ilə laureatları seçir. Bu vaxta qədər bir çox tanınmış simalar bu nüfuzlu
mükafata layiq görülüblər.
16:26 30.07.2025
Oxunuş sayı: 6611
