Deputat: "Partiya sədrliyinə seçkilərdə iştirak etmək niyyətindəyəm" - MÜSAHİBƏ

Deputatlar bütün ölkələrdə olduğu kimi, Azərbaycanda da ictimai rəydə daim gündəmdə olan personalardandırlar. Bunu nəzərə alaraq Milli Məclisin deputatları ilə silsilə müsahibələrimizi davam etdiririk. Bu dəfəki müsahibimiz Milli Məclisin deputatı, Ana Vətən partiyasının sədr müavini Günay Ağamalıdır. O, həm xarici, həm də daxili siyasətlə bağlı suallarımızı cavablandırdı:

- Günay xanım, sizcə, xaosun getdikcə artdığı dünyada Azərbaycanın balanslı xarici siyasəti bizim üçün nə vəd edir?

- Bugünkü dünyada geosiyasi risklər və toqquşmalar dərinləşir, beynəlxalq hüququn prinsipləri zaman-zaman ikili standartlarla əvəz olunur. Belə bir zaman kəsiyində Cənab Prezident İlham Əliyevin rəhbərliyi ilə həyata keçirilən balanslı, praqmatik və milli maraqlara söykənən xarici siyasət ölkəmizin təhlükəsizliyini, suverenliyini və müstəqil mövqeyini möhkəmləndirir. Azərbaycanın eyni zamanda güc mərkəzləri ilə qarşılıqlı hörmətə əsaslanan münasibətlər qurması, bizi bölgədə etibarlı tərəfdaşa, dünya miqyasında isə söz sahibi olan bir dövlətə çevirib. Bu siyasət  sabitlik, davamlı inkişaf və gələcəyə inam deməkdir.

- Rusiya ilə Azərbaycan arasındakı münasibətlərin hazırkı səviyyəsini necə qiymətləndirirsiniz?

- Azərbaycan-Rusiya münasibətləri tarixi proseslərə, qarşılıqlı maraqlara və bərabərhüquqlu əməkdaşlığa əsaslanır. Bu əlaqələr təkcə siyasi müstəvi ilə məhdudlaşmır, iqtisadi, humanitar, mədəni və enerji sahələrini də əhatə edir. Bəlli olduğu kimi Azərbaycanın mülki təyyarəsinin Rusiya səmalarında vurulması ilə bağlı bütün arqumentlər ortadadır. Bu baxımdan ölkə prezidentinin və Azərbaycan xalqının Rusiyadan gözləntiləri var. Lakin təəssüf ki, rəsmi Moskva hələ də susmaqda davam edir. Digər xoşagəlməz detallar da mövcuddur.  Azərbaycan tərəfi bir  qayda olaraq mehriban qonşuluq münasibətlərinə sədaqət nümayiş etdirərək, öz milli maraqlarına sadiq qalaraq balanslı mövqeyini qoruyur.

-  Azərbaycan və Ermənistan liderlərinin BƏƏ-də keçirilən görüşü tərəflər arasında yaxın zamanda sülh sazişinin imzalanmasına dair ümidləri artırır. Bunu real hesab edirsiniz?

- Azərbaycan tərəfi hər zaman Cənubi Qafqazda sülhün və təhlükəsizliyin tərəfdarı olub. Qeyd etmək istərdim ki, BƏƏ-də keçirilən görüş müsbət diplomatik təşəbbüsdür və tərəflər arasında dialoqun davam etməsi üçün mühüm platformadır. Lakin sülhə doğru real addımlar yalnız Ermənistanın revanşist ritorikadan və qeyri-konstruktiv, qeyri-səmimi mövqedən əl çəkməsi ilə mümkün olacaq. Ərazi bütövlüyümüz və suverenliyimiz əsasında formalaşacaq sülh sazişi regionda davamlı sabitliyin təməlini qoyacaq. Ermənistan konstitusiyasında və hüquqi normativ aktlarında Azərbaycana qarşı ərazi iddialarını aradan qaldırmalıdır. Sülh bunsuz mümkün deyil.

- Qarabağda görülən yenidənqurma işləri bütün dünyanın diqqətindədir. Qarabağa böyük qayıdış dünya üçün hansı mesajları verir?

- Qarabağda aparılan bərpa və quruculuq işləri təkcə bir regionun dirçəlməsi deyil, eyni zamanda Azərbaycanın gücünün, iradəsinin və tarixi ədaləti bərpa etmək əzminin təcəssümüdür. Bu, həm də dünyaya sülh və inkişaf naminə nümunəvi bir model təqdim edir. Böyük Qayıdış milli ləyaqətin bərpası, maddi-mədəni irsimizin yenidən canlanması və on minlərlə soydaşımızın doğma torpaqlara qovuşması deməkdir. Bu proses göstərir ki, Azərbaycan təkcə müharibədə deyil, həm də sülhdə qalibdir.

- Günay xanım, siz həm də psixoloqsuz. Ermənistan baş naziri Nikol Paşinyanın Rusiya ilə Qərb arasında qaldığı çətin bir vaxtda onun psixoloji portretini cızmağınız maraqlı olardı.

- Nikol Paşinyanın siyasi davranışları psixoloji baxımdan qeyri-müəyyənlik, qərarsızlıq kimi xüsusiyyətləri əks etdirir. Paşinyanın qərarlarında rasionallıqdan çox emosionallıq və qorxu halları müşahidə olunur. Liderlik yalnız fərqli ritorika ilə deyil, sabit psixoloji dayanıqlıqla da ölçülür və bu məqamların bəziləri Ermənistan rəhbərliyində çatışmır.

-  İkinci Qarabağ müharibəsindən sonra Azərbaycan xalqının sosial psixologiyasında hansı dəyişiklikləri müşahidə edirsiniz?

- 44 günlük Zəfər müharibəsi və 23 saatlıq antiterror əməliyyatı xalqımızın milli özünüdərkində dönüş nöqtəsi oldu. Bu gün Azərbaycan cəmiyyəti daha qürurlu, özünəinamlı  durumdadır. Psixoloji baxımdan xalqımızda güvən hissi, qalib xalqın məsuliyyəti və milli həmrəyliyi güclənib. Ölkə başçısı, Müzəffər Ali Baş Komandan Cənab İlham Əliyevə olan sonsuz inam və sevgi, Şəhidlərimizin müqəddəs ruhuna hörmət, qazilərimizə ehtiram və azad edilən torpaqlara qayıdış həvəsi cəmiyyətin mənəvi birliyini daha da möhkəmləndirir. Bu psixoloji yüksəliş Azərbaycanın gələcək inkişafında da mühüm rol oynayacaq.

- Süni intellektin insan həyatına təsiri barədə müxtəlif fikirlər var. Hətta Qazaxıstan Prezidenti Kasım-Jomərt Tokayev bu yaxınlarda demişdi ki, bəzi siyasətçilər çıxışlarını süni intellektlə hazırlayır. Necə düşünürsünüz, süni intellekt həyatımıza necə təsir edir?

- Süni intellekt artıq həyatımızın bir çox sahəsində reallığa çevrilib. Bu texnologiyanın imkanlarından düzgün  istifadə olunarsa, insan fəaliyyətini daha səmərəli, sürətli və məlumatlı edə bilər. Amma, eyni zamanda bu texnologiyanın yaratdığı təhlükələri – saxta məlumatların yayılması, insanlararası ünsiyyətinin zəifləməsi və qərarların avtomatlaşdırılması ilə bağlı təhlükəklər və risklər də nəzərə alınmalıdır. Siyasətdə süni intellektdən istifadə, alqoritmik vasitələrin insan duyğusunu, empatiyasını və məsuliyyətini əvəz edə bilməz. Unutmamalıyıq ki, insan faktoru və onun zəkası əvəzolunmazdır.

- Bu il Azərbaycan mətbuatının 150 illiyi tamam olur. Mediamızın hazırkı durumu barədə nə deyə bilərsiniz?

- Azərbaycan mətbuatı zəngin və şərəfli tarixi ilə milli düşüncənin formalaşmasında mühüm rol oynamışdır. Bu gün də medianın üzərinə böyük məsuliyyət düşür – informasiyanın operativ və obyektiv təqdimatı, ictimai rəyin formalaşdırılması, milli və dövlət maraqların müdafiəsi. Rəqəmsal çağırışlar fonunda Azərbaycan mediası özünü daim təkmilləşdirməli, həm peşəkarlıq, həm də etik dəyərlər baxımından cəmiyyətin etibarını hər zaman doğrultmalıdır. Möhtərəm Cənab Prezident İlham Əliyevin bu sahəyə xüsusi diqqəti medianın inkişafında əvəzsiz rol oynayır.

- Son olaraq, sədr müavini olduğunuz Ana Vətən Partiyası Azərbaycan daxili siyasətində hansı rola malikdir? Gələcəkdə partiyanın sədri olmaq barədə planlarınız varmı?

- Ana Vətən Partiyası müstəqilliyimizə, dövlətçilik ideallarına, milli maraqlarımıza və Ulu Öndərimiz Heydər Əliyevin siyasi irsinə, dövlətçilik konsepsiyasına və bu siyasi kursu uğurla davam etdirən Cənab Prezident İlham Əliyevin fəaliyyətinə sadiqdir. Partiyamız daim ölkənin strateji hədəflərinə söykənərək siyasi proseslərdə konstruktiv iradəni ortaya qoyur və dövlətçilik ənənələrinə sədaqət nümayiş etdirir . Mənim üçün önəmli olan partiyanın uğurlu fəaliyyəti, dövlətimizə və xalqımıza xidmətidir. Əlbəttə, liderlik məsuliyyətdir və bu məsuliyyət şəxsi ambisiyalarla deyil, komanda ruhu, xalqın və dövlətin maraqları ilə müəyyənləşməlidir. Gələcək planlarım zamanın və siyasi reallıqların diktəsi ilə öz həllini tapacaqdır. Bəlli olduğu kimi, bu ilin payızında partiyamız növbədənkənar qurultayını keçirəcək.  Qurultayda hörmətli sədrimiz Fəzail Ağamalının öz arzusu ilə istefası gözlənilir. Səmimi etiraf edim ki, partiyanın sədr seçkilərində iştirak etmək niyyətindəyəm.

Kənan Novruzov