İsrail hökuməti Qəzza yaxınlığında yeni hava limanının inşasına yaşıl işıq yandırıb
İsrailin Binyamin Netanyahu hökuməti Qəzza zolağı yaxınlığında yeni hava limanının inşasına dair planı təsdiqləyib. Layihənin Necef (Negev) bölgəsinin şimalında yerləşən Ziklaq ərazisində həyata keçirilməsi nəzərdə tutulur. Həmin əraziyə Qəzzaya yaxınlığı səbəbindən daha əvvəl rədd edilmiş bu plan indi təhlükəsizlik vəziyyətindəki dəyişikliklər fonunda yenidən gündəmə gəlib.
Crossmedia.az xəbər verir ki, “Haaretz” qəzetinin məlumatına görə, Baş nazir Netanyahu və Nəqliyyat naziri Miri Regevin də iştirak etdiyi iclasda rəsmilər yeni hava limanı layihəsinin icrasını mümkün hesab etdikləri təhlükəsizlik şərtlərini təqdim ediblər.
Eyni zamanda İsrailin şimalındakı Ramat David bölgəsində inşa olunması planlaşdırılan başqa bir hava limanı layihəsinin də irəlilədiyi və onun təxminən 6 milyard şekelə (təxminən 1,7 milyard ABŞ dolları) başa gələcəyi bildirilir.
Ziklaq bölgəsində hava limanı inşası məsələsi İsrailin Milli Planlaşdırma və Tikinti Şurası tərəfindən qiymətləndiriləcək. Mütəxəssislər bu hava limanının, Necef bölgəsində yerləşən və geniş istifadə olunmayan Ramon hava limanı kimi uğursuz ola biləcəyini bildirirlər.
İsrail Planlaşdırma İdarəsi səkkiz il əvvəl bu ərazidə tikilməsi təklif olunan hava limanının uçuş dəhlizlərinin Ben-Qurion beynəlxalq hava limanı və yaxınlıqdakı hərbi hava bazalarının uçuş xətləri ilə toqquşacağı qənaətinə gəlmişdi. Bu səbəbdən təklif olunan obyektin əlavə hava limanı kimi real funksionallığa malik olmayacağı və Ben-Qurion hava limanındakı onsuz da sıx olan eniş-qalxış rejimini daha da gərginləşdirəcəyi vurğulanmışdı.
Aviasiya sahəsinin rəsmiləri “Haaretz” qəzetinə bildiriblər ki, qəbul olunan qərar daha çox siyasi xarakter daşıyır. Onların sözlərinə görə, nazir Regev və deputat Almog Kohen bu planı peşəkar dəstək olmasa belə, həyata keçirməkdə israrlıdır. Qeyd olunur ki, bu təşəbbüs Netanyahunun Likud Partiyası ilə əlaqəli yerli dairələrin təzyiqi nəticəsində gündəmə gəlib.
Layihənin həyata keçirilməsinə dair prosesə İsrailin Milli Nəqliyyat İnfrastruktur Şirkəti – Netivei Israel nəzarət edəcək. Şirkətin yaydığı açıqlamada qeyd olunub ki, hökumətin qərarından sonra Beit Kama (Ziklaq) bölgəsində əlavə hava limanı planına dair əsas prinsiplər üç ay ərzində təqdim ediləcək.
Açıqlamada həmçinin qeyd olunub ki, şirkət Nəqliyyat Nazirliyi adından layihənin texniki və ekoloji dəyərləndirməsi, əlaqəli qurumlarla koordinasiya və ətraflı icra planının hazırlanması da daxil olmaqla bütün mərhələlərinə peşəkar yanaşma göstərəcək.
“Haaretz” qəzetinin iyun ayında dərc etdiyi xəbərə görə, Baş nazir Netanyahu Müdafiə Nazirliyinə Necef bölgəsində inşa olunacaq beynəlxalq hava limanına alternativlər təqdim etməyi tapşırmışdı. Müdafiə qüvvələri o zaman bu bölgədə sivil hava yollarının sıxlığı və təhlükəsizlik baxımından risk daşıdığı barədə xəbərdarlıq etmişdi.
Son 10 ildə, xüsusilə də Netanyahu hökumətləri dövründə yeni hava limanının inşası ilə bağlı qərarların gecikdirildiyi bildirilir. Peşəkar planlaşdırma komitələri səkkiz il əvvəl əlavə hava limanlarının Ramat David və Nevatim bölgələrində tikilə biləcəyini təklif etmişdilər. Lakin İsrailin şimalındakı yerli idarələr bu plana qarşı çıxaraq kənd təsərrüfatı torpaqlarının və ekosistemin zərər görəcəyini əsas göstərmişdilər.
Digər tərəfdən, Dimona meri Benni Biton və onunla birgə fəaliyyət göstərən “Nevatimdən qalxan Necef” koalisiyası Ziklaq bölgəsinin hava limanı üçün alternativ kimi göstərilməsini “reallıqdan uzaq və absurd” adlandırıb.
Mədinə Cəlilova
22:15 07.07.2025
Oxunuş sayı: 7830
