ABŞ Yunanıstandakı hərbi varlığını artırır: Vaşinqton diqqətini Dədəağaca yönəldir
Yunanıstan mətbuatında dərc olunan analizlərə əsasən, ABŞ-nin bu ölkədə artan hərbi varlığı xüsusilə Krit adasındakı Souda hərbi bazası və şimal-şərqdə yerləşən Dədəağac limanı ətrafında cəmlənib.
İsrail və İran arasında 12 gün davam edən müharibədən sonra elan olunan atəşkəsin ardınca Yaxın Şərqdə gərginlik nisbətən azalsa da, ABŞ-nin regiona yaxın Yunanıstandakı hərbi mövcudiyyətini genişləndirdiyi müşahidə olunur.
Crossmedia.az xəbər verir ki, “Kathimerini” qəzetində yayımlanan “Prioritetlər dəyişdikcə ABŞ Yunanıstandakı hərbi varlığını genişləndirir” başlıqlı analizə görə, Vaşinqton strateji obyektlərdən istifadəsini artırıb.
Məlumata görə, ABŞ son aylarda İranın raket təhdidlərinə qarşı İsrailin müdafiəsini gücləndirmək üçün Aralıq dənizinə donanma və hava qüvvələri yerləşdirib. Bu prosesdə, ABŞ hərbçilərinin “Aralıq dənizində ən yaxşısı” adlandırdığı Souda bazası logistika və əməliyyat mərkəzi kimi əsas rol oynayıb.
ABŞ və Yunanıstan arasında imzalanan “Müdafiə sahəsində qarşılıqlı əməkdaşlıq sazişi” (MDCA) Kritdəki Souda bazasını uzun müddətdir “kritik obyekt” kimi tanıyır. Son dövrlərdə bazanın anbar tutumu artırılıb və bölgəyə Arleigh Burke sinifli destroyerlər yerləşdirilib. Həmçinin buraya qırıcı təyyarələr və pilotsuz aparatlara qarşı müdafiə sistemləri də gətirilib. ABŞ, eyni zamanda, Yunanıstan Hərbi Hava Qüvvələrinin yerləşdirdiyi Patriot raket batareyaları ilə də dəstək alır.
ABŞ-nin diqqət yönəltdiyi digər mühüm nöqtə isə Dədəağaç limanıdır. NATO-nun şərq cinahında mühüm logistika mərkəzi kimi çıxış edən bu liman vasitəsilə Bolqarıstan və Rumıniyaya hərbi yüklər daşınır. Bura, eyni zamanda, dənizə çıxışı olmayan dövlətlərin Qara dənizə çıxışının məhdud olduğu hallarda enerji və kommersiya yükləri üçün tranzit dəhlizi rolunu oynayır.
Yaxın günlərdə ABŞ-dən gələcək hərbi nümayəndə heyətinin Dədəağaçdakı limanı və yaxınlıqdakı Giannoulis hərbi düşərgəsini yoxlaması gözlənilir. Hazırda ABŞ bu düşərgədə məhdud şəkildə təmsil olunur.
Analitiklər hesab edir ki, Vaşinqtonun Souda və Dədəağaça artan marağı, ABŞ-nin Yunanıstanı müdafiə planlamasında uzunmüddətli strateji tərəfdaş kimi görməsinin göstəricisidir. Digər tərəfdən, Donald Tramp rəhbərliyində olan ABŞ administrasiyasının Avropa və Yaxın Şərqdəki öhdəliklərindən uzaqlaşmaq niyyətində olduğu bildirilir.
Analizdə qeyd edilir ki, ABŞ Müdafiə Nazirliyində Rusiya-Ukrayna müharibəsi kimi münaqişələrə daha az müdaxilə edilməsini müdafiə edən qrup getdikcə güclənir. Bu, ABŞ-Çin rəqabətinin getdikcə artdığı Hind-Sakit okean bölgəsinə doğru strateji yönəlişi də əks etdirir.
“İsrailin təhlükəsizliyindən uzaqlaşmağın asan məsələ olmadığı artıq aydın şəkildə görünür”, – deyə qeyd olunan yazıda, ABŞ-nin strateji prioritetlərindəki dəyişimin regional güclərin artıq görməzdən gələ bilməyəcəyi yeni bir mərhələnin başlanğıcı olduğu vurğulanır.
Mədinə Cəlilova
21:40 07.07.2025
Oxunuş sayı: 724
