İrandan yüz minlərlə əfqan qaçqın deportasiya olunub – BMT narahatdır
BMT-nin Beynəlxalq Miqrasiya Təşkilatı bildirir ki, son bir ay ərzində İrandan yarım milyona yaxın əfqan qaçqın deportasiya edilib. Təşkilatın məlumatına görə, bu proses iyun ayının əvvəlindən başlayaraq iyulun 5-dək davam edib və ümumilikdə 449 min 218 nəfər əfqan vətəndaşı İrandan çıxarılıb.
Crossmedia.az xarici mediaya istinadən bildirir ki, deportasiya edilənlərin sayı bəzi günlərdə rekord həddə çatıb. İyunun ortalarında sərhədi keçənlərin sayında ciddi artım müşahidə olunub. Elə günlər olub ki, Əfqanıstana bir gündə 40 min nəfərdən çox insan daxil olub. Ümumilikdə bu il ərzində İrandan və digər ölkələrdən Əfqanıstana qayıdanların sayı 906 min 326 nəfərə çatıb.
Qeyd olunur ki, mayın sonunda İran rəsmiləri sənədsiz yaşayan əfqan qaçqınların iyulun 6-dək ölkə ərazisini tərk etməli olduqlarını elan ediblər. Bu açıqlamadan sonra deportasiya dalğası daha da güclənib.
BMT xəbərdarlıq edir ki, bu miqyaslı deportasiyalar Əfqanıstanda onsuz da mövcud olan sosial-iqtisadi çətinlikləri daha da dərinləşdirə bilər. Təşkilat bildirir ki, yoxsulluq, işsizlik və qeyri-sabitliklə mübarizə aparan Əfqanıstan belə bir insan axınına hazır deyil və bu vəziyyət ölkənin sabitliyini ciddi şəkildə təhdid edə bilər.
Fatimə Nəbiyeva
18:26 07.07.2025
Oxunuş sayı: 8449
