Türkiyə üçün tarixi mərhələ: PKK-ın varlığına son qoyulur
"Türkiyə” qəzeti mənbələrə istinadla məlumat yayıb ki, yaxın vaxtlarda PKK terror təşkilatı tarixə çevrilə bilər.
Nəşr yazır ki, PKK-nın tərksilah edilməsi iyul ayında baş verəcək tamamlayıcı addımlarla sürət qazanacaq:
“İyulda hər şey aydınlaşacaq. İyul PKK üçün final ayıdır. Silahsızlaşdırma prosesi hüquqi tənzimləmələrlə paralel həyata keçiriləcək. Çünki söhbət 50 mindən çox insandan gedir. Onların heç də hamısı silahlılar deyil. Silahsızlaşdırılanlar, yaxud müxtəlif vaxtlarda məhkum olunaraq İraq, Suriya, Avropa, ABŞ kimi ölkələrə gedənlər var. Bu məqamda yalnız 150-200 nəfərlik lider heyəti üçün xüsusi reqlamentlər hazırlanacaq. Digərləri ilə bağlı hüquqi konsepsiya ümumi olacaq”.
Nəşrin mənbələri Şimali İraqda silahların təhvil alınması üçün hərbi hazırlıqların tamamlandığını qeyd edib.
Mövzu ilə bağlı politoloq Natiq Miri Crossmedia.az-a açıqlama verib.
O, bildirib ki, PKK terror təşkilatı qlobal güclərin aləti olsa da, bu gün Türkiyəni zəiflətmək üçün terrorla siyasi nəticə əldə etmək mümkün deyil: "PKK terror təşkilatı qlobal güclər tərəfindən qardaş Türkiyə dövlətinin cəmiyyətinin başına hörülmüş bir bəladır. Ancaq bu gün Türkiyə elə bir inkişaf mərhələsinə çatıb ki, artıq bu cür terror qruplaşmalarından istifadə etməklə, yaxud da terror vasitəsilə Türkiyə dövlətini zəiflətmək və konkret siyasi nəticələr əldə etmək mümkün deyil".
Politoloq qeyd edib ki, PKK-nın həbsdə olan lideri Abdullah Öcalan müraciətində kürdlərlə Türkiyə arasında barış və inteqrasiyanı vacib sayır: " Öcalanın müraciətində də bu reallıqlar dolayısı ilə ifadə olunub. Ona görə də həm PKK terror təşkilatı, həm də onu dəstəkləyən kürdlər, bütövlükdə isə Türkiyə dövlətinə inteqrasiya baxımından artıq 30 ildən çoxdur ki, problem yaşayan və düşmənçilik edən kürd toplumuna barışıq imkanı yaranır. Öcalanın müraciətində bu məsələlərə yer verilir və ən doğru yol kimi barış kontekstində güclü, demokratik, hüquqa əsaslanan və insan hüquqlarına hörmət edən bir Türkiyə dövlətinin qurulması, bu prosesdə də kürdlərin iştirakı vacib sayılır".
N.Miri prosesin uğurla başa çatacağı halda, Türkiyə sabitlik yolunda mühüm mərhələni geridə qoyaraq “terorsuz Türkiyə” hədəfinə çata biləcəyini deyib: "Bu baxımdan, 1970-ci illərdən bəri Türkiyə cəmiyyətinə bəla olan terrorun bitirilməsi üçün real imkan, şans və mühit yaranıb. Əgər bu proses uğurla həyata keçirilərsə – ki, bu məsələdə alternativ də yoxdur – hesab edirəm ki, Türkiyə sabitlik baxımından böyük bir mərhələni geridə qoyacaq və “terorsuz Türkiyə” layihəsi reallaşacaq".
Müsahibimiz Türkiyədə inteqrasiya prosesinin həm cəmiyyətin birliyini möhkəmləndirəcəyini, həm də dövlətə qarşı təzyiqləri azaldaraq hərtərəfli inkişafı təmin edəcəyini bildirib: "Bununla yanaşı, Türkiyə cəmiyyətində inteqrasiya prosesi baş verəcək. Bu isə hərtərəfli inkişafın yolunu açacaq. Əlavə olaraq, Türkiyə dövlətinə və hakimiyyətinə qarşı müxtəlif təzyiq mexanizmləri də avtomatik şəkildə aradan qalxacaq. Toplumda barış və birlik hökm sürəcək ki, bu da Türkiyənin gələcəyini işıqlandıran əsas amillərdən biridir".
Onun sözlərinə görə, bu proses terrora xərclənən vəsaitlərin inkişafa yönəldilməsinə şərait yaradacaq: "Nəticə etibarilə, həm regionda, xüsusilə də Türkiyə daxilində cəmiyyətin birliyinə və barışa böyük ehtiyac var. Bu, Türkiyənin terrora xərclədiyi böyük maliyyə vəsaitlərini inkişafa və iqtisadi sahələrə yönəltməsinə imkan verəcək. Əgər regional, ölkə daxili və qlobal səviyyədə terrorun bitirilməsi, silahların təhvil verilməsi və Türkiyə cəmiyyətinə inteqrasiya prosesi uğurla nəticələnərsə, bu, 21-ci əsrdə həm Türkiyə dövləti, həm də AK Parti – Cümhur İttifaqı birliyi üçün ən böyük nailiyyətlərdən biri olacaq".
Fatimə Nəbiyeva
17:27 03.07.2025
Oxunuş sayı: 689
