Azərbaycanla Qazaxıstan arasında yeni sənədlər imzalana bilər- Deputat
Son illər Mərkəzi Asiya və Cənubi Qafqaz regionunda geosiyasi və iqtisadi proseslərin sürətlənməsi Azərbaycan və Qazaxıstan münasibətlərinin daha da dərinləşməsinə təkan verib. Orta Dəhliz, enerji əməkdaşlığı, nəqliyyat-logistika xətləri və rəqəmsal infrastruktur kimi strateji istiqamətlərdə hər iki ölkənin maraqlarının üst-üstə düşməsi bu tərəfdaşlığı sadəcə dostluq çərçivəsindən çıxarıb və onu strateji müttəfiqlik səviyyəsinə yüksəldib.
Tarixi, mədəni və mənəvi bağlar üzərində qurulan bu münasibətlər bu gün həm regional təhlükəsizlik, həm də qlobal nəqliyyat və iqtisadi şəbəkələrin inkişafı baxımından mühüm əhəmiyyət daşıyır. Türk dünyası daxilində inteqrasiyanın dərinləşməsi fonunda Azərbaycan–Qazaxıstan əməkdaşlığı regional əməkdaşlığın nümunəvi modelinə çevrilməkdədir.
Mövzu ilə bağlı Milli Məclisin deputatı Aydın Hüseynov Crossmedia.az-a açıqlama verib:
"Azərbaycan və Qazaxıstan arasında münasibətlər bu gün dostluq və strateji əməkdaşlıq səviyyəsindədir. İki türk dövləti qardaşlıq və güclü tərəfdaşlıq münasibətlərinin daha da inkişaf etdirilməsində maraqlıdır və bu, bütün sahələrdə özünü göstərir. Türk Dövlətləri Təşkilatı çərçivəsində əlaqələrimiz xüsusilə intensivdir. İki ölkə arasında əməkdaşlıq bütün istiqamətləri əhatə etsə də, iqtisadi sahədə əlaqələr xüsusilə dinamik şəkildə inkişaf edir. Azərbaycan və Qazaxıstan iqtisadi sahədə bir-birini tamamlayır, birgə layihələr həyata keçirir və gələcəyə hesablanmış yeni əməkdaşlıq platformaları formalaşdırır".
Deputat həmçinin bildirib:
"Cənab Prezidentin Qazaxıstana gözlənilən səfəri çərçivəsində yeni sənədlər imzalanması da tamamilə mümkün hesab olunur. Düşünürəm ki, mövcud trendlər davam edərsə, gələcəkdə Azərbaycan və Qazaxıstan iqtisadi əməkdaşlığı ən yüksək səviyyəyə çatdıran ölkələrdən birinə çevriləcək".
Ayhan
08:55 21.10.2025
Oxunuş sayı: 1472
