Azərbaycan rəqəmsal texnologiyaların sürətli inkişafına uyğunlaşır - Deputat
Qlobal rəqəmsal infrastrukturun genişlənməsi müasir beynəlxalq əməkdaşlığın əsas istiqamətlərindən birinə çevrilib. Dövlətlər artıq yalnız enerji və nəqliyyat kommunikasiya xətləri ilə deyil, həm də yüksək sürətli məlumat ötürmə kanalları vasitəsilə bir-birinə bağlanır. Bu baxımdan Xəzər hövzəsində həyata keçirilən yeni telekommunikasiya layihələri təkcə iqtisadi deyil, həm də geostrateji əhəmiyyət daşıyır.
Rəqəmsal bağlantının gücləndirilməsi region ölkələrinin qlobal informasiya şəbəkələrinə daha səmərəli inteqrasiyasına şərait yaradır, həmçinin Avropa ilə Asiya arasında yeni texnoloji körpülər qurur. Bu istiqamətdə atılan addımlar gələcək iqtisadi dinamikanın, innovasiya proseslərinin və informasiya təhlükəsizliyinin əsas dayaqlarından biri kimi qiymətləndirilir.
Mövzu ilə bağlı Milli Məclisin deputatı Elşad Musayev Crossmedia.az-a açıqlama verib :
"Azərbaycan və Qazaxıstan arasında Xəzər dənizinin dibi ilə transxəzər optik kabel xəttinin çəkilməsi üzrə bu il əməli işlərə başlanılması gözlənilir. Layihə çərçivəsində təxminən 50–60 milyon ABŞ dolları həcmində sərmayənin yatırılması planlaşdırılır. Bu məqsədlə “QazaxTelekom” və “Azərtelekom” şirkətləri arasında birgə müəssisə yaradılıb. Sualtı fiber-optik xəttlərin çəkilməsi və layihəni icra edəcək podratçı şirkətin seçilməsi prosesinin yekunlaşmaq üzrə olduğu bildirilir".
Deputat həmçinin qeyd edib:
"Xəttin uzunluğunun Xəzər dənizinin dibi boyunca təqribən 370 kilometr olacağı nəzərdə tutulur. Qeyd edək ki, bu kabel xətti Avropa və Asiya arasında rəqəmsal telekommunikasiya dəhlizinin yaradılmasını hədəfləyən “Rəqəmsal İpək Yolu” layihəsinin mühüm tərkib hissəsini təşkil edir. Başqa sözlə, bu layihə iki qitə arasında birbaşa və sürətli rəqəmsal əlaqə quracaq. Müxtəlif texniki göstəricilərlə bağlı əlavə rəqəmlər və detallı məlumatlar yaxın zamanda açıqlanacaq. Bununla belə artıq aydındır ki, layihə region üçün strateji əhəmiyyətə malikdir. Bu gün dünya əvvəlki kimi sərhədlərlə ayrılmış böyük məkan kimi görünmür – qlobal inteqrasiya insanları və dövlətləri vahid informasiya mühitinə yaxınlaşdırır. Rəqəmsal texnologiyaların sürətli inkişafı fonunda Azərbaycanın da bu dəyişikliklərə uyğunlaşması və beynəlxalq rəqəmsal layihələrdə aktiv iştirak etməsi mühüm zərurətdir. Ölkəmiz inkişafı davam etdirmək və qlobal rəqabətdə irəlidə olmaq istəyirsə, bu cür strateji layihələrdə iştirakı təmin etməlidir və hazırda da bunu uğurla edir".
Ayhan
22:40 20.10.2025
Oxunuş sayı: 8034
