Tropik meşələrin yox olması iqlimi dəyişə bilər - alimlər xəbərdarlıq edir
252 milyon il əvvəl baş verən və “Böyük Məhv Olma” adlanan iqlim fəlakəti zamanı Yer kürəsindəki canlıların 90 faizi yox olmuşdu. Yeni araşdırmaya görə, həmin dövrdə tropik meşələrin sıradan çıxması Yer kürəsində istixana effektinin illərlə davam etməsinə səbəb olub.
Crossmedia.az xəbər verir ki, bu barədə CNN məlumat verib.
İngiltərənin Qərbi Yorkshiredə yerləşən Leeds Universiteti və Çin Geologiya Universitetinin alimləri Cənubi Çində yerləşən qədim fosil izlərini araşdıraraq məlum ediblər ki, meşələrin çöküşü nəticəsində karbonu udan təbii sistemlər sıradan çıxıb. Vulkan püskürmələri dayansa da, atmosferdəki karbon qazı yüksək səviyyədə qalaraq Yeri milyonlarla il ərzində istidə saxlayıb.
Alimlər bildirirlər ki, bu hadisə iqlim dəyişiklikləri zamanı kritik “geri dönməz nöqtə”nin necə işə düşə biləcəyini göstərir. Əgər günümüzdə Amazon kimi tropik meşələr böyük miqyasda məhv olarsa, bənzər bir effekt yaşana bilər: karbon udulması dayanacaq və istiləşmə davam edəcək, hətta insan fəaliyyəti nəticəsində emissiyalar azalsa belə.
Tədqiqatçılar tropik meşələrin qorunmasının qlobal iqlim sabitliyi üçün həyati vacib olduğunu vurğulayırlar. Çünki bu meşələr Yer kürəsinin “karbon buferi” rolunu oynayır və onların itirilməsi uzunmüddətli və dağıdıcı iqlim nəticələrinə səbəb ola bilər.
Nigar Rəhimova
16:52 02.07.2025
Oxunuş sayı: 6498
