“İsrail ilə İran arasında böyükmiqyaslı qarşıdurma hələ qabaqdadır” - Azərbaycan üçün təhlükə varmı?
İranlı ekspertlər Yaxın Şərqdə gərginliyin yenidən alovlanacağına dair ciddi siqnallar verməkdədir. Onların sözlərinə görə, ABŞ və İsrail mövcud atəşkəsdən istifadə edərək yenidən güc toplamağa çalışır və qarşıdakı günlərdə İrana qarşı daha dağıdıcı hərbi əməliyyatların başlaması mümkündür.
Məsələ ilə bağlı politoloq Samir Hümbətov Crossmedia.az-a açıqlama verib. Politoloqun sözlərinə görə, hazırda müşahidə olunan atəşkəs sadəcə müvəqqəti xarakter daşıyır və bu dövrü tərəflərin bir-birini analiz etdiyi mərhələ kimi dəyərləndirmək olar: “Bu, sadəcə olaraq nəbz yoxlaması kimi dəyərləndirilə bilər. İlk qarşıdurmalarda tərəflər bir-birinin zəif və güclü tərəflərini müəyyən etməyə çalışırlar ki, növbəti mərhələdə həmin boşluqları aradan qaldıraraq daha effektiv şəkildə hərbi nüfuz əldə edə bilsinlər. Ona görə hesab edirəm ki, hələ ən böyük qarşıdurma qabaqdadır və bu qarşıdurma böyük miqyaslı ola bilər, hazırda mövcud olan sakitlik vəziyyəti uzunmüddətli və dayanıqlı hesab etmək çətindir. Münaqişənin kökləri və tərəflərin geosiyasi maraqları nəzərə alındıqda, qarşıdakı dövrdə daha sərt və genişmiqyaslı qarşıdurma ehtimalı yüksəkdir“.
Onun sözlərinə görə əgər daha genişmiqyaslı müharibə baş verərsə, oradan qaçqın axını ehtimalı var: "Biz bu prosesi idarə etməli və bu insanları müəyyən müddət ərzində dəyərli şəkildə qarşılayıb yerləşdirməli ola bilərik. Bu, təşkil oluna bilən məsələdir. Amma ümumi götürdükdə hesab etmirəm ki, Azərbaycan üçün birbaşa təhlükə olacaq. Bu qarşıdurma Azərbaycan ərazisi üzərindən baş vermir və Azərbaycan rəsmi olaraq dəfələrlə bəyan edib ki, onun ərazisindən heç bir tərəfə qarşı hərbi təhdid olmayacaq, buna imkan verilməyəcək. Həmçinin Azərbaycan bu məsələdə neytrallığını qoruyub saxlayır. Bəzi dairələr Azərbaycanı bu müharibəyə cəlb etmək istəsə də, inanmıram ki, bu baş verəcək. Amma qaçqın axını riski var. Eyni zamanda, orada istifadə edilə biləcək müəyyən növ silahların radiasiya və ya kimyəvi təhlükəsi varsa, bu, müəyyən dərəcədə hava yolu ilə Azərbaycana da təsir edə bilər. Lakin bu mərhələdə birbaşa təhlükə görmürəm".
O, qeyd edib ki, Azərbaycan üçün ən uyğun diplomatik yanaşma neytrallığı qoruyub saxlamaq və tərəfləri danışıqlar masasına əyləşdirməyə təşviq etməkdir.
“Məncə, burada neytrallığı qorumaq və tərəfləri barışa təşviq etmək daha məqbul variantdır. Azərbaycan həm İsraillə dostluq münasibətləri saxlayır, həm də İranla qonşu dövlətdir. Həm də unutmamalıyıq ki, İranda bizim soydaşlarımız yaşayır və onların taleyi bizi narahat edir. Əvvəlki qarşıdurmalardan birində Azərbaycan tərəfi İsraillə əlaqə yaradaraq orada yaşayan azərbaycanlıların yaşadığı şəhərlərin hədəfə alınmaması ilə bağlı xahişlərini çatdırıb. Bu, bir daha göstərir ki, Azərbaycan regionda daha genişmiqyaslı qarşıdurmanın olmasının tərəfdarı deyil,” – politoloq fikrini yekunlaşdırıb.
Fidan Qarayeva
18:25 01.07.2025
Oxunuş sayı: 13282
