Tramp: “ABŞ İsrail-İran münaqişəsində iştirak etmir, lakin gələcəkdə müdaxilə mümkündür”
Amerika Birləşmiş Ştatlarının Prezidenti Donald Tramp İsrail ilə İran arasında artan gərginlik fonunda verdiyi açıqlamada ABŞ-nin hazırda münaqişəyə cəlb olunmadığını bildirib. Crossmedia.az xəbər verir ki, Tramp rəsmi Vaşinqtonun münaqişədə birbaşa iştirak etmədiyini, lakin gələcəkdə vəziyyətin dəyişməsinin mümkün olduğunu qeyd edib.
“Biz bu işə qarışmamışıq. Ola bilər ki, müdaxilə edək. Lakin hazırda bu prosesdə iştirak etmirik,” – deyə Tramp vurğulayıb.
Tramp eyni zamanda İranla aparılan diplomatik danışıqlara da toxunub. Onun sözlərinə görə, konkret son tarix müəyyən edilməsə də, dialoq davam etməkdədir: “Xeyr, heç bir dedlayn yoxdur. Lakin onlar razılaşma istəyirlər. Onlar hələ də danışıqlar aparırlar.”
Qeyd edək ki, daha öncə ABŞ və İran arasında Omanda keçirilməsi nəzərdə tutulan növbəti danışıqlar raundu ləğv olunub. Lakin Tramp hesab edir ki, bu gərginlik danışıqlara mane olmaq əvəzinə, əksinə, mümkün razılaşmanı daha da sürətləndirə bilər.
Müsahibə zamanı Tramp maraqlı bir məqamı da açıqlayıb. Onun sözlərinə görə, Rusiya Prezidenti Vladimir Putin ABŞ ilə İran arasında münaqişənin həllində vasitəçilik təklif edib.
Nigar Yahyazadə
21:11 15.06.2025
Oxunuş sayı: 10956
