İranda hücum qorxusu: Tehran sakinləri paytaxtı kütləvi tərk edir
CNN-in məlumatına görə, İran paytaxtı Tehranda minlərlə insan İsrailin daha genişmiqyaslı hücumlarına hazırlaşdığı qorxusu ilə şəhəri tərk etməyə başlayıb.
Crossmedia.az xəbər verir ki, İsrail baş naziri Benyamin Netanyahunun Tehrana qarşı əlavə zərbələr endirə biləcəyi ilə bağlı açıqlamaları şəhərdə böyük narahatlıq yaradıb. Nəticədə Tehran yollarında ciddi tıxaclar yaranıb, nəqliyyatın hərəkəti iflic olub.
Şəhər sakinləri əsasən ölkənin şimalına, Xəzər dənizi sahillərinə üz tutmağa çalışırlar. CNN-in bölgədəki müxbirlərinə görə, digər şəhərlərdə də oxşar vəziyyət müşahidə olunur. Şirazda əhali yanacaqdoldurma məntəqələri və ərzaq dükanları qarşısında növbələr yaradıb. Əhalinin əsas tələbat məhsulları – su, uşaq bezləri və quru ərzaq alışında artım müşahidə olunur.
İran hökuməti hələlik kütləvi köçə və yaranmış panikaya rəsmi reaksiya verməyib.
18:50 15.06.2025
Oxunuş sayı: 9541
