Pakistan müdafiə naziri: “İsrailin hücumları qarşısında müsəlman ölkələri birləşməlidir”
Pakistanın müdafiə naziri Xavaca Məhəmməd Asif İsrailin İrana hücumlarından sonra Milli Məclisdə çıxış edərək müsəlman ölkələrini vahid mövqe nümayiş etdirməyə çağırıb.
Crossmedia.az türk mediasına istinadən verdiyi xəbərə görə, nazir bildirib ki, İsrailin son günlər İran, Yəmən və Fələstini hədəfə alması bütün İslam dünyası üçün ciddi təhlükə siqnalıdır:
“Müsəlman ölkələri indi birləşməsə, hər biri eyni aqibətlə üzləşə bilər”, – deyə Asif xəbərdarlıq edib.
M.Asif İsraillə diplomatik münasibətləri olan müsəlman ölkələrini bu əlaqələri dərhal dayandırmağa səsləyib və İslam Əməkdaşlıq Təşkilatının (İƏT) növbədənkənar iclas keçirməli olduğunu, birgə müdafiə strategiyasının hazırlanmasının vacibliyini vurğulayıb.
Nazir, eyni zamanda, Pakistanın İranla yaxın və tarixi münasibətlərə malik olduğunu qeyd edərək bu ölkənin maraqlarını beynəlxalq platformalarda müdafiə edəcəklərini bildirib.
Nə baş verib?
İyunun 13-də İsrailin İranın paytaxtı Tehran da daxil olmaqla bir neçə şəhərində yerləşən nüvə obyektlərinə və yüksək rütbəli hərbi komandirlərə qarşı həyata keçirdiyi hava hücumları regionda vəziyyəti kəskinləşdirib.
Hücumlar nəticəsində İran Silahlı Qüvvələrinin Baş Qərargah rəisi, İnqilab Keşikçiləri Korpusunun baş komandanı, bir neçə yüksək rütbəli hərbçi və 9 nüvə alimi həlak olub. Ümumilikdə 78 mülki şəxsin öldüyü, yüzlərlə insanın yaralandığı bildirilir.
Cavab olaraq İran İsrailə qarşı “Sadıq Vəd 3” adlı əməliyyat çərçivəsində ballistik raketlər və pilotsuz uçuş aparatları ilə hücum edib. İranın raket zərbələri nəticəsində İsraildə 3 nəfər ölüb, 172 nəfər yaralanıb.
Aybəniz Səfərova
19:11 14.06.2025
Oxunuş sayı: 1101
