İsrail–İran qarşıdurması: Bölgədə vəziyyət gərginləşir
İsrailin İrana qarşı həyata keçirdiyi genişmiqyaslı hərbi əməliyyat Yaxın Şərqdə ciddi eskalasiyaya səbəb olub.
Crossmedia.az xarici KİV-lərə istinadən xəbərə verir ki, hücumun hədəfləri, nəticələri və beynəlxalq reaksiyalar artıq qlobal gündəmin əsas mövzusuna çevrilib.
Əməliyyatın miqyası:
İsrail hərbi mənbələrinin məlumatına görə, hava zərbələri İran ərazisində yerləşən onlarla strateji obyektə yönəlib.
Hədəflər sırasında ölkənin nüvə proqramı ilə əlaqəli əsas qurğular və uzaqmənzilli ballistik raket istehsal müəssisələri yer alıb.
CNN-ə danışan israilli hərbi rəsmi bildirib ki, əməliyyat birgünlük deyil və növbəti mərhələlərlə davam etdirilə bilər.
Hədəfdə nüvə alimləri və yüksək rütbəli komandirlərdir:
İsrail xüsusi xidmət orqanlarının nümayəndəsi yerli mediaya açıqlamasında bildirib ki, ilkin mərhələdə zərbələr İranın hərbi elitası və nüvə alimlərinin yerləşdiyi obyektlərə endirilib.
"Bu şəxslərin zərərsizləşdirilməsi ehtimalı yüksəkdir və proses davam edir".
Korpus rəhbərinin ölümü barədə iddialar:
İranın bir sıra dövlət KİV-ləri zərbələr nəticəsində SEPAH-ın (İslam İnqilabı Keşikçiləri Korpusu) baş komandanı general Hüseyn Salamiyə aid ölümü barədə məlumat yayıb.
Lakin bu iddialar rəsmi şəkildə təsdiqlənməyib.
Zərər və dağıntılar:
İran mediasının yaydığı görüntülərdə paytaxt Tehran və digər bölgələrdə dağıntılar, yanğınlar və xüsusilə Natanzdakı nüvə obyektindən qalxan tüstü müşahidə olunur. Müxtəlif yaşayış massivlərinin də zərər gördüyü bildirilir.
İsraildə fövqəladə vəziyyət və səfərbərlik:
İsrail hökuməti ölkə daxilində fövqəladə rejim elan edib. Məktəblər və kütləvi tədbirlər dayandırılıb, vətəndaşlara evdə qalmaq tövsiyə olunub. Xəstəxanalar təcili rejimə keçib, orduda isə on minlərlə ehtiyat hərbçi səfərbər olunub.
Vaşinqtonun mövqeyi:
CNN-in məlumatına görə, ABŞ administrasiyası (xüsusilə Donald Tramp rəhbərliyi) əməliyyatdan əvvəl məlumatlandırılıb. Dövlət katibi Marko Rubio bəyan edib ki, Birləşmiş Ştatlar əməliyyatda iştirak etməyib və İsrailə hərbi yardım göstərməyib. “ABŞ-nin əsas prioriteti regiondakı qüvvələrinin təhlükəsizliyidir”, – deyə o qeyd edib.
Danışıqların taleyi sual altındadır
ABŞ və İran arasında nüvə proqramına dair altıncı danışıqlar raundunun bu bazar günü Oman Sultanlığında keçirilməsi planlaşdırılırdı.
Lakin baş verən hadisələr fonunda diplomatik prosesin gələcəyi qeyri-müəyyən olaraq qalır.
Aybəniz Səfərova
09:48 13.06.2025
Oxunuş sayı: 10762
