İran: Bəzi Avropa ölkələri İsrailin nüvə proqramına dəstək verir
İran xarici işlər nazirliyinin sözçüsü İsmayıl Bekayi bildirib ki, Tahran rəhbərliyi İsrailin hərbi nüvə proqramına dair ələ keçirdikləri sənədlərlə bəzi Avropa ölkələrinin bu proqramda iştirakını sübut edəcək.
Crossmedia.az xəbər verir ki, Bekayi Tehranda keçirdiyi mətbuat konfransında regional və beynəlxalq məsələlərə dair açıqlamalar verib. O, İran kəşfiyyatının İsrailin nüvə layihələri və obyektlərinə dair minlərlə sənədi ələ keçirdiyini və bu sənədlərin bəzi Avropa ölkələrinin Tel-Əvivin hərbi nüvə proqramında fəal iştirakını üzə çıxaracağını bildirib.
“Bəziləri daim nüvə silahlarının yayılmasının qarşısının alınmasından danışır və İranın dinc nüvə proqramını sorğulayır, amma eyni zamanda İsrailin hərbi nüvə proqramını gücləndirmək və təchiz etmək üçün fəal şəkildə çalışırlar”, – deyə Bekayi vurğulayıb.
O, həmçinin ABŞ ilə danışıqlara dair də açıqlama verərək, növbəti görüşün vaxtının hələlik müəyyənləşmədiyini bildirib: “Əgər qərar verilərsə, elan olunacaq. ABŞ-nin yeni sanksiyaları Vaşinqtonun danışıqlar məsələsində ciddi olmadığını göstərir. ABŞ-nin ziddiyyətli davranışları onların gerçək niyyətlərinə dair şübhə yaradır”.
Bekayi İsrailin Qəzzaya yardım aparan “Madleen” gəmisinə beynəlxalq sularda müdaxilə etməsinə də toxunaraq bu addımı “beynəlxalq hüquq baxımından quldurluq” adlandırıb. O, gəmidə olan 12 nəfərin İsrail qüvvələri tərəfindən oğurlandığını deyib və beynəlxalq təşkilatları – xüsusilə BMT və Qızıl Xaç Komitəsini Qəzzadakı blokadanın aradan qaldırılması üçün təcili tədbirlər görməyə çağırıb.
Mədinə Cəlilova
01:00 10.06.2025
Oxunuş sayı: 8707
