Lavrov: "Britaniya Ukraynanın Rusiyaya qarşı terror aktlarını dəstəkləyir"
"Ukraynanın Rusiyaya qarşı törətdiyi terror aktları Böyük Britaniyanın dəstəyi olmadan mümkün deyil".
Crossmedia.az TASS-a istinadən xəbər verir ki, bunu Rusiyanın xarici işlər naziri Sergey Lavrov Moskvada keçirilən "2050-ci ilin Forumu"nda çıxışı zamanı səsləndirib.
“Ukraynalı nasistlərin Kursk vilayətində törətdiklərini hamımız gördük. Orada döyüş fəaliyyətləri ilə əlaqələndirilə biləcək bircə obyekt belə yoxdur. Bu səbəbdən baş verənlər bizim üçün təəccüblü olmadı”, – Lavrov qeyd edib.
Nazir əlavə edib ki, Rusiya Prezidenti bu məsələ ilə bağlı sonuncu hökumət iclasında konkret nəticələrə gəlib və həmin nəticələr əsasında addımlar atılacaq.
Lavrovun sözlərinə görə, hücumların Ukrayna tərəfindən həyata keçirildiyi aydındır, lakin Britaniyanın dəstəyi olmadan Kiyev rejimi bunu gerçəkləşdirə bilməzdi:
“Yüz faiz əminliklə deyə bilərəm ki, bu prosesin arxasında Böyük Britaniya dayanır. Bəlkə də adət üzrə ABŞ xüsusi xidmət orqanları da işə cəlb olunub, lakin əsas rolu məhz Britaniya oynayır”.
Nazir həmçinin bildirib ki, Kiyev rejimi bu cür taktikadan müharibənin ilk günlərindən istifadə edir.
Onun sözlərinə görə, Rusiya Silahlı Qüvvələri isə yalnız hərbi obyektləri - ordu bazalarını, texnika anbarlarını və silahlı qüvvələr tərəfindən istifadə edilən keçmiş mülki infrastrukturu hədəfə alır.
“Təhlükələrin qarşısının alınması təkcə Federal Təhlükəsizlik Xidmətinin deyil, həmçinin Daxili İşlər Nazirliyi, Rusiya Qvardiyası və digər xüsusi xidmət orqanlarının birgə fəaliyyəti ilə təmin olunmalıdır. Eyni zamanda, əhalinin sayıqlığının artırılması vacibdir və bu istiqamətdə zəruri tədbirlər davam etdirilir”, – deyə Lavrov vurğulayıb.
Aybəniz Səfərova
20:36 09.06.2025
Oxunuş sayı: 8654
