İtaliyada əcnəbilərə vətəndaşlıq üçün yeni qaydalar səsvermədə
İtaliyada Avropa İttifaqına daxil olmayan ölkələrdən gəlib bu ölkədə yaşayan əcnəbilərin vətəndaşlıq almaq üçün tələb olunan fasiləsiz 10 illik yaşayış müddətinin 5 ilə endirilməsi təklifi üzrə referendum başlayıb.
Crossmedia.az xəbər verir ki, daxili işlər nazirliyinin məlumatına görə, referendumda ölkə üzrə qeydiyyatda olan 51,3 milyon seçicini maraqlandıran iki mövzu üzrə ümumilikdə beş sual səsverməyə çıxarılıb. Yerli vaxtla saat 07:00-da (Bakı vaxtı ilə 09:00) başlayan səsvermə bu gün və sabah olmaqla iki gün davam edəcək.
Referendumun əsas məsələsi 1992-ci il tarixli vətəndaşlıq qanununda dəyişiklik edilməsidir. Müxalifət partiyaları və vətəndaş cəmiyyəti təşkilatlarının topladığı 600 mindən çox imzanın Konstitusiya Məhkəməsi tərəfindən qəbul edilməsindən sonra məsələ səsverməyə çıxarılıb.
Əgər seçicilər bu suala “bəli” cavabı verərsə, İtaliyada vətəndaşlıq almaq üçün tələb olunan fasiləsiz 10 illik yaşayış şərti 5 ilə endiriləcək. Bu dəyişiklik təqribən 2,5 milyon əcnəbi mənşəli insanın vətəndaşlıq üçün müraciət etməsinə imkan yarada bilər.
Referendumda həmçinin əmək hüquqları ilə bağlı digər dörd sual da səsverməyə çıxarılıb. Bu suallar haqsız işdən çıxarılmalara qarşı işə bərpa öhdəliyinin bərpası, 16-dan az işçisi olan kiçik müəssisələrdə təzminat limitlərinin yumşaldılması, müddətli müqavilələrin geniş yayılmasının məhdudlaşdırılması, altpodratçılarda əməyin mühafizəsi məsuliyyətinin artırılması və iş qəzalarında podratçıların məsuliyyətinin genişləndirilməsi ilə bağlıdır.
Bu dörd suala da “bəli” cavabı verilərsə, 2015-ci ildən qüvvədə olan və “Jobs Act” olaraq tanınan əmək qanunvericiliyi islahatları ləğv ediləcək.
İtaliya qanunvericiliyinə əsasən, referendumu etibarlı saymaq üçün seçicilərin ən azı 50%+1-nin səsvermədə iştirak etməsi tələb olunur. Bu hədd keçilməzsə, referendum nəticəsindən asılı olmayaraq qüvvəyə minməyəcək.
Mədinə Cəlilova
22:50 08.06.2025
Oxunuş sayı: 655
