Rusiya: İstanbul razılaşmalarını tətbiq etməyə hazırıq
Rusiya Ukrayna ilə İstanbulda əldə olunan razılaşmaları yerinə yetirməyə hazır olduğunu açıqlayıb.
Crossmedia.az xəbər verir ki, bu barədə Rusiya Baş Qərargahının İnformasiya İdarəsi rəis müavini, eyni zamanda müzakirə heyətinin üzvü Aleksandr Zorin məlumat verib.
Zorin Bryansk bölgəsində jurnalistlərə verdiyi açıqlamada, 2 iyun tarixində İstanbulda əldə olunan razılaşmalara əsasən, Ukraynaya 6 min donmuş hərbçi cəsədinin təhvil verilməsinə hazır olduqlarını və dəyiş-tutaq nöqtəsində gözlədiklərini bildirib. O qeyd edib: “Hərbçi cəsədlərinin təhvil verilməsi və əsirlərin dəyişdirilməsi ilə bağlı əldə olunan razılaşmaları tətbiq etməyə hazırıq”.
O, Ukrayna tərəfinin bu prosesə hələlik razılıq vermədiyini də vurğulayıb: “Əldə etdiyimiz siqnallara əsasən, bu prosesin gələn həftəyə təxirə salınması mümkündür. Ukrayna tərəfinin tanınmış kanal vasitəsilə cəsədlərin təhvil verilməsinə dair rəsmi bildirişini gözləyirik”.
İstanbulda keçirilən birbaşa danışıqlarda Rusiya heyətinə rəhbərlik etmiş Vladimir Medinski də dünən “Telegram” kanalında açıqlama yayaraq, Ukrayna tərəfini razılaşdırılmış öhdəliklərə əməl etməyə çağırıb. O bildirib: “Ukrayna, cəsədlərin qəbulu və əsir dəyişimini gözlənilmədən qeyri-müəyyən müddətə təxirə salıb”.
Mədinə Cəlilova
22:00 08.06.2025
Oxunuş sayı: 728
