ABŞ və Çin nümayəndələri Londonda ticarət danışıqlarına başlayır
ABŞ və Çin arasında artan ticarət gərginliyini azaltmaq məqsədilə iki ölkənin nümayəndə heyətləri iyunun 9-da Londonda bir araya gələcək.
Crossmedia.az xəbər verir ki, görüş ABŞ Prezidenti Donald Trampın Çin rəsmiləri ilə yeni ticarət razılaşması müzakirə ediləcəyini bildirməsindən sonra elan olunub.
ABŞ tərəfini Xəzinədarlıq Naziri Skott Bessent, Ticarət Naziri Hovard Lutnik və Ticarət Nümayəndəsi Cemison Qriyer təmsil edəcək. Çin tərəfi də bu görüşü təsdiqləyib.
Çin Xarici İşlər Nazirliyi bildirib ki, Baş nazirin iqtisadi əlaqələr üzrə müavini Xı Lifın 8-13 iyun tarixlərində Böyük Britaniyada səfərdə olacaq və səfər çərçivəsində Çin-ABŞ iqtisadi və ticarət məsləhətləşmə mexanizminin ilk iclası keçiriləcək.
Gərginliyin səbəbi – qarşılıqlı tarif artımı
Apreldə Donald Tramp Çin də daxil olmaqla bəzi ölkələrə əlavə gömrük rüsumları tətbiq etdikdən sonra Pekin buna cavab verdi və nəticədə iki ölkə arasında tarif qarşıdurması başladı. ABŞ Çin mallarına 145%, Çin isə ABŞ məhsullarına 125% rüsum tətbiq etdi.
Mayın 10-11-də Cenevrədə keçirilən görüşdə tərəflər qarşılıqlı rüsumların 90 gün ərzində azaldılmasına qərar verdi. Razılaşmaya əsasən, mayın 14-dən ABŞ rüsumları 30%-ə, Çin isə 10%-ə endirdi.
Lakin Tramp mayın 30-da Çin tərəfini razılaşmaya tam əməl etməməkdə günahlandırdı və bu məsələni Çin Prezidenti Si Cinpinlə müzakirə edəcəyini açıqladı.
ABŞ tərəfi, həmçinin Pekinin nadir metalların ixracına nəzarəti ləğv etmədiyini bildirərək, Çinlə bağlı əlavə məhdudiyyətlər tətbiq etdi – süni intellekt texnologiyaları və proqram təminatının ixracı dayandırıldı, bəzi Çinli tələbələrin vizaları ləğv edildi.
Qeyd edək ki, iyunun 5-də Tramp və Si ilk dəfə telefonla əlaqə saxlayaraq danışıqları davam etdirmək və razılaşmaların icrasını sürətləndirmək barədə razılığa gəliblər.
21:53 07.06.2025
Oxunuş sayı: 7675
