Qəzzada səhiyyə sistemi tamamilə çöküb
Qəzza zolağının cənubunda səhiyyə sistemi çökmək üzrədir.
Crossmedia.az xəbər verir ki, Qəzza Səhiyyə Nazirliyi İsrailin Amal və Nasser xəstəxanalarına qarşı təhdidlərini bölgənin səhiyyə infrastrukturunu hədəf alan sistematik planın tərkib hissəsi kimi qiymətləndirib.
Nazirliyin yaydığı açıqlamada qeyd olunub ki, İsrail ordusu Amal Xəstəxanasının yerləşdiyi ərazini təhlükəli qarşıdurma zonası elan edərək bölgənin təxliyəsini tələb edib. Hazırda xəstəxanaya giriş mümkün deyil.
Məlumata görə, Xan Yunisdə yerləşən Nasser Xəstəxanası hazırda Qəzzanın cənubunda fəaliyyət göstərən yeganə tibb müəssisəsidir. Qəzza-Avropa Xəstəxanası fəaliyyətini dayandırıb, Amal Xəstəxanası isə tam mühasirədədir.
Nazirlik xəbərdarlıq edib ki, Nasser Xəstəxanası da fəaliyyətini dayandırsa, bölgədə səhiyyə sistemi tamamilə çökəcək.
Ümumdünya Səhiyyə Təşkilatı bəyanat yayaraq Nasser və Amal xəstəxanalarının dərhal mühafizə altına alınmasına çağırıb.
BMT-yə tabe təşkilatlar və digər beynəlxalq qurumlar isə xəstəxanaların qorunmasını, xəstələrin təhlükəsiz təxliyəsini və təcili tibbi ləvazimatların bölgəyə çatdırılmasını tələb edirlər.
Qeyd edək ki, 2023-cü il oktyabrın 7-dən bəri İsrailin Qəzzaya qarşı apardığı hərbi əməliyyatlar nəticəsində 54 677 fələstinli həyatını itirib, 125 530 nəfər isə yaralanıb.
Son hücumlarda həlak olanların əksəriyyətini qadınlar, uşaqlar və yaşlılar təşkil edir.
20:59 07.06.2025
Oxunuş sayı: 8333
