Tramp: “Ukrayna Putinə Kiyevi bombalamaq üçün bəhanə verdi”
ABŞ prezidenti Donald Tramp Ukrayna-Rusiya müharibəsi ilə bağlı verdiyi qalmaqallı açıqlaması ilə diqqət çəkib. O, bəyan edib ki, Ukrayna bəzi addımları ilə Rusiya liderinə hücum üçün əsas yaradıb. Trampın bu fikirləri beynəlxalq mediada rezonansa səbəb olub.
Crossmedia.az xarici mediaya istinadən bildirir ki, Tramp Ukrayna Təhlükəsizlik Xidmətinin (SBU) həyata keçirdiyi “Hörümçək toru” (Паутина) adlı xüsusi əməliyyatı şərh edərkən bildirib: “Onlar Putinə fürsət verdilər ki, gəlib Kiyevi bombalasın. Mənə bu xoş gəlmədi. Bu əməliyyatı görəndə dedim ki, indi zərbə olacaq”. Prezidentin sözlərinə görə, həmin addım Rusiya tərəfindən sərt reaksiya ilə qarşılanmalı idi və nəticə də gözlənilən kimi oldu.
Tramp, həmçinin, Ukrayna münaqişəsinin daha geniş miqyaslı – xüsusilə də nüvə qarşıdurmasına səbəb ola biləcəyindən narahatlığını ifadə edib. “Ümid edirəm ki, bu müharibə nüvə savaşı ilə nəticələnməz” – deyə o bildirib. Onun bu sözləri vəziyyətin nə dərəcədə təhlükəli olduğuna dair xəbərdarlıq kimi qiymətləndirilir.
Digər tərəfdən, ABŞ Senatında Rusiyaya qarşı hazırlanan yeni sanksiyalar paketi də Trampın diqqət mərkəzində olub. O, sənədi “çox güclü” adlandırıb və bildirib ki, bu tədbirlər ancaq zəruri hal yarandığı təqdirdə tətbiq olunacaq. “Əgər ehtiyac olsa, tətbiq edəcəyik. Bu barədə qərarı şəxsən mən verəcəyəm” – deyə Tramp əlavə edib.
Bununla belə, prezident həmin sanksiyalar paketini dəstəkləyib-dəstəkləmədiyini konkret şəkildə açıqlamayıb. Onun bu qeyri-müəyyən münasibəti ABŞ daxilində və beynəlxalq ictimaiyyətdə müxtəlif fikirlərə yol açıb. Analitiklər Trampın yanaşmasını həm siyasi manevr, həm də gələcək prezidentlik kampaniyası üçün ehtiyatlı mövqe kimi dəyərləndirirlər.
Fatimə Nəbiyeva
11:19 07.06.2025
Oxunuş sayı: 6332
