Ukrayna Rusiyanın iki strateji hava bazasına hücum etdiyini açıqlayıb
Ukrayna Silahlı Qüvvələri, Rusiyanın Saratov və Ryazan bölgələrində yerləşən iki hava bazasına gecə saatlarında uğurlu hücumlar təşkil etdiklərini açıqlayıb.
Crossmedia.az xəbər verir ki, bu barədə Ukrayna ordusu məlumat yayıb.
Hədəf alınan bazalardan birinin ölkənin cənubunda, digərinin isə paytaxt Moskva yaxınlığında yerləşdiyi bildirilib.
Ukrayna rəsmiləri həmin hava bazalarının Ukraynaya raket hücumları həyata keçirən Rusiya bombardmançı təyyarələri tərəfindən istifadə edildiyini bəyan edib. Bildirilir ki, hücumlarda pilotsuz uçuş aparatları (PUA) tətbiq olunub. Əvvəlki açıqlamalarda bu hücumların “Hörümçək toru əməliyyatı” çərçivəsində həyata keçirildiyi və Rusiyaya milyardlarla dollarlıq zərər verdiyi qeyd olunmuşdu.
Ukrayna ordusu tərəfindən bu gün yayılan açıqlamada, “6 iyun gecəsi, düşmən təyyarələrinin cəmləşdiyi Saratov bölgəsindəki Engels hava bazasına uğurlu zərbələr endirildi”,- deyilib. Açıqlamada həmçinin Ryazan bölgəsində yerləşən Dyagilevo hava bazasının da vurulduğu bildirilib. Bu bazanın hava təminatı və müşayiət təyyarələri üçün istifadə edildiyi və Ukraynaya qarşı raket hücumlarında rol oynadığı qeyd olunub.
Rusiyanın müdafiə azirliyi isə Ukraynaya məxsus 174 PUA-nın ölkənin müxtəlif bölgələrində, o cümlədən Moskva üzərində hava hücumundan müdafiə sistemləri tərəfindən vurulduğunu açıqlayıb. Nazirlik, PUA-ların Bryansk, Rostov, Saratov, Voronej, Kalujsk, Kursk, Oryol, Ryazan, Tula, Belgorod, Tambov və işğal olunmuş Krım üzərində də məhv edildiyini bildirib. Bundan əlavə, Qara dəniz üzərində Ukraynaya məxsus üç “Neptun-MD” qanadlı raketin də vurulduğu qeyd edilib.
Tambov bölgəsinin Miçurinsk şəhərində PUA hücumu nəticəsində bir müəssisədə yanğın baş verib, üç nəfər xəsarət alıb. İki nəfər xəstəxanaya yerləşdirilib. Saratov bölgəsinin Engels şəhərində də bir sənaye müəssisəsində yanğın və bir çoxmərtəbəli binada zərər qeydə alınıb. Saratov qubernatoru Roman Busargin, hadisə nəticəsində xəsarət alan olmadığını bildirib.
Moskva meri Sergey Sobyanin də vurulan PUA hissələrinin düşdüyü ərazilərdə aidiyyəti xidmətlərin iş apardığını açıqlayıb. Sosial şəbəkələrdə yayılan və Reuters tərəfindən təsdiqlənmiş görüntülərdə hadisə yerindən qalxan qara tüstü müşahidə olunub.
Mədinə Cəlilova
23:00 06.06.2025
Oxunuş sayı: 8572
