Miçiqan Universitetində Fələstinə dəstək verən tələbələrə gizli izləmə
ABŞ-nin Miçiqan Universitetində Qəzza üçün etiraz edən tələbələrin gizli agentlər tərəfindən izlənildiyi ortaya çıxıb.
Crossmedia.az xəbər verir ki, “The Guardian” qəzetinin məlumatına görə, universitet rəhbərliyi Fələstin tərəfdarı fəaliyyət göstərən tələbə qruplarını nəzarətdə saxlamaq üçün xüsusi araşdırmaçılarla əməkdaşlığa başlayıb.
Tələbələr kampus daxilində və xaricində izlənilib, danışıqları dinlənilib və hərəkətləri qeydə alınıb. Beş tələbə bu tədbirlərin onları qorxutmaq məqsədi daşıdığını bildirib. Paylaşılan video görüntülərində gizli agentlərin tələbələrə qarşı söyüş işlətməsi, təhdid etməsi və hətta birinin avtomobili ilə tələbənin üstünə sürməsi əks olunub.
Tələbələrdən biri həmin şəxsi üzləşdirdikdə, agentin özünü əlil kimi göstərməyə çalışdığı və tələbəni onu soyğunçuluqda ittiham etdiyi bildirilib. Bu şəxslərin Detroit mərkəzli City Shield adlı xüsusi təhlükəsizlik şirkəti üçün çalışdığı ehtimal olunur. Qəzetin araşdırdığı polis və maliyyə qeydləri göstərir ki, toplanan bəzi “sübutlar” tələbələrə qarşı cinayət ittihamı irəli sürmək üçün istifadə olunub. Lakin bu ittihamların çoxu sonradan ləğv edilib.
Universitetin maliyyə sənədlərinə əsasən, 2023-cü ilin iyunundan 2024-cü ilin sentyabrına qədər City Shield şirkətinin ana qurumu Ameri Shield-ə azı 800 min dollar ödənilib.
Təqib olunduğunu bildirən tələbələrdən biri də “Azadlıq və Bərabərlik üçün Tələbə İttifaqı”nın üzvü Katrina Keating olub. O, 2023-cü ilin noyabrından bəri daim izlənildiyini hiss etdiyini deyib və “aktivistləri izləmək üçün milyonlarla dollar xərcləmək ağılsızlıqdır” fikrini bölüşüb.
Tələbələrin verdiyi məlumata görə, agentlər adətən qruplar şəklində fəaliyyət göstərir. Kafelərdə və barlarda yaxın masalarda əyləşərək söhbətləri dinləyirlər. The Guardian, bu iddiaların tələbələr tərəfindən təqdim olunan video materiallarla təsdiqləndiyini bildirib.
Miçiqan Universiteti isə məsələ ilə bağlı heç bir rəsmi şikayət almadığını və təhlükəsizlik tədbirlərinin yalnız kampusda təhlükəsizliyi təmin etməyə yönəldiyini bildirib. Universitet rəhbərliyi tələbələrin izlənildiyini isə təkzib etməyib.
Mədinə Cəlilova
23:40 06.06.2025
Oxunuş sayı: 975
