Paşinyan ailəsini tənqid edən mətbu orqanı məhkəməyə verir
Ermənistanın Baş naziri Nikol Paşinyan “Qraparak” qəzetini məhkəməyə verəcəyini bildirib.
Crossmedia.az xəbər verir ki, bu barədə o, “Facebook” hesabında yazıb.
“Qraparak qəzetinə qarşı mütləq şəkildə məhkəmə iddiası qaldıracağam ki, sübut edilsin – mənim üçün ailə və mənəvi həyat bir dəyər və prinsipdir, insanları aldatmaq vasitəsi deyil”, – deyə o qeyd edib.
Baş nazir həmçinin Ermənistan Apostol Kilsəsinin rəhbəri Katolikos II Qareginə qarşı da ciddi ittiham irəli sürüb. Onun sözlərinə görə, II Qaregin subaylıq andına zidd olaraq ailə həyatı qurub və övladı var.
“Bu kontekstdə bəyan edirəm ki, Katolikos Qaregin II subaylıq andını pozub və onun övladı var. Əgər özünü bəyan etdiyi dəyərlərə və Katolikos statusuna uyğun hesab edirsə, qoy məni məhkəməyə versin”, – Paşinyan bildirib.
O, həmçinin vurğulayıb ki, Ermənistan Apostol Kilsəsinin dəyərlərinə hörmətlə yanaşır, lakin bu dəyərləri ləkələyən şəxslərin artıq cəmiyyətdə qəbul edilməməli olduğunu düşünür:
“Ermənistan Apostol Kilsəsi bizim müqəddəsliyimizdir, kimliyimizdir. Bu müqəddəsliyi ləkələyənlər layiqli cavabı almalıdır”.
Hazırda nə “Qraparak” qəzeti, nə də Katolikos II Qaregin bu ittihamlara cavab verməyib.
Qeyd edək ki, “Qraparak” qəzeti Nikol Paşinyan haqqında yayımladığı məqalədə onun ailə və şəxsi həyatına dair tənqidi iddialar irəli sürüb. Məhz bu səbəbdən Baş nazir hüquqi addım atacağını açıqlayıb.
17:45 06.06.2025
Oxunuş sayı: 858
