ABŞ Prezidenti Rusiya-Ukrayna müharibəsini uşaqların dalaşmasına bənzətdi
ABŞ Prezidenti Donald Tramp Almaniya kansleri Fridrix Merzi Ağ Evin Oval kabinetində qəbul edib.
Crossmedia.az xəbər verir ki, görüşdə əsas müzakirə mövzusu Rusiya-Ukrayna müharibəsinin gedişi və mümkün diplomatik həll yolları olub.
Tramp, müharibənin dayandırılmasının vacibliyində Almaniya ilə eyni mövqedə olduqlarını vurğulayıb və bu məsələni Merzlə ətraflı şəkildə müzakirə edəcəklərini bildirib. O, həm Moskva, həm də Kiyev administrasiyasına ayrıca xəbərdarlıq etdiyini də açıqlayıb.
ABŞ-ın Rusiyaya qarşı yeni sanksiyalar tətbiq edib-etməyəcəyi ilə bağlı suala cavab verən Tramp, “Əgər Rusiyanın dayanmamaq niyyətində olduğunu görsək, çox sərt sanksiyalarla cavab verəcəyik. Rusiya qırmızı xətti keçsə, mənim nə qədər sərt ola biləcəyimə təəccüblənəcəksiniz”, – deyə xəbərdarlıq edib.
Münaqişənin davam etdiyi təqdirdə həm Rusiyaya, həm də Ukraynaya qarşı sanksiyaların gündəmə gələ biləcəyini bildirən Tramp, “Düzünü desəm, bu, hər iki tərəfə aid olacaq. Bilirsiniz, tanqo rəqsi iki nəfərlə olur. Bu məsələdə sərt olacağıq – istər Rusiya olsun, istərsə də başqa bir ölkə”, – deyə əlavə edib.
Tramp, Rusiya Prezidenti Vladimir Putinlə dünən baş tutan telefon danışığına toxunaraq bildirib:
"Putin mənə Ukraynaya hücum etməkdən başqa çıxış yolunun qalmadığını dedi. Mən isə ona açıq şəkildə bu fikirdən daşınmasını söylədim".
Sonda Tramp, Rusiya-Ukrayna müharibəsinin tezliklə sona çatmasının vacibliyini qeyd edərək belə deyib: “Hindistanla Pakistan arasındakı müharibəni dayandıra bildim və bununla qürur duyuram. Kaş bu müharibəni də eyni şəkildə dayandıra biləydim”.
23:20 05.06.2025
Oxunuş sayı: 8794
