Li: Şimali Koreya ilə danışıqları bərpa edəcəyəm
Cənubi Koreyada keçirilən növbədənkənar prezident seçkilərində qalib gələn Li Jae-Myunq çərşənbə günü erkən saatlarda and içərək vəzifəsinin icrasına başlayıb.
Crossmedia.az xəbər verir ki, yeni prezident açılış nitqində əsas hədəflərini açıqlayaraq, Koreya yarımadasında sülhə nail olmaq məqsədilə Şimali Koreya ilə danışıqları bərpa edəcəyinə söz verib. Li həmçinin bildirib ki, Pxenyanın nüvə və digər hərbi təhdidlərinə qarşı ABŞ-la birgə “güclü çəkindirmə” siyasəti aparacaq.
Li vurğulayıb ki, “Şimali Koreya ilə ünsiyyət kanalı açılacaq və danışıqlar yolu ilə əməkdaşlıq təmin ediləcək”. O, Pxenyanla illərdir aparılmayan danışıqları yenidən başlamağa hazır olduğunu bildirib. Seul, Vaşinqton və Tokio ilə üçtərəfli əməkdaşlığı gücləndirməyə çalışacağını qeyd edən prezident deyib: “Milli maraqlara əsaslanan praqmatik diplomatiya vasitəsilə böhranı fürsətə çevirəcəyik”.
Li hökuməti yavaşlayan daxili iqtisadiyyat, ABŞ-ın tarif artımları və qeyri-sabit beynəlxalq şərait daxil olmaqla ciddi problemlərlə üzləşəcək. Yeni prezident ölkədəki iqtisadi durğunluqla “baş-başa müharibə” aparacağına və dövlət xərclərini artıracağına da söz verib.
Yaponiyanın Baş naziri Şiqeru İşiba Lini təbrik edərək, ən qısa zamanda onunla sammit görüşü keçirmək istədiyini bildirib. ABŞ Dövlət Departamenti isə Seul-Vaşinqton alyansına sarsılmaz sadiqlik nümayiş etdirdiyini vurğulayıb.
Şimali Koreya və Rusiyanın artan hərbi əməkdaşlığı isə Seul üçün ciddi çağırış hesab olunur. Pxenyanın Rusiya ilə silah və qoşun mübadiləsi apardığı, hətta Ukrayna müharibəsinə hərbi dəstək verdiyi iddia olunur. Rusiya tərəfindən Şimali Koreyanın nüvə texnologiyaları ilə təchiz edilməsi ehtimalı Cənubi Koreya və müttəfiqləri üçün narahatlıq doğurur.
Dövlət mediası Şimali Koreyanın yeni esminesinin müasir silahlar və nüvə raketləri daşımaq üçün nəzərdə tutulduğunu iddia etsə də, ekspert Edvard Houell qeyd edib ki, bu, rejimin nüvə tanınması və sağ qalmaq istəyi ilə bağlıdır.
Zəhra Ağayeva
11:20 05.06.2025
Oxunuş sayı: 9748
