Hafterin hökuməti Türkiyə ilə dəniz sazişini ratifikasiya edə bilər
Liviya parlamentinin şərq qanadı Türkiyə ilə dəniz sərhədlərinin demarkasiyası barədə sazişin öyrənilməsi üçün texniki komitə yaratmaq qərarına gəlib.
Crossmedia.az xəbər verir ki, bu qərar Tobruk administrasiyası ilə Ankara arasında yaxınlaşmanın fonunda qəbul olunub və sazişin Hafter tərəfdarları tərəfindən ratifikasiya olunacağı gözlənilir.
Qeyd edək ki, Türkiyə son zamanlar Liviyanın şərqindəki hakimiyyət strukturları ilə fəal əməkdaşlıq edir. Xüsusilə Hafterin oğlunun Ankaraya səfəri zamanı Liviya Milli Ordusu (LMO) ilə müdafiə sahəsində əməkdaşlıq sazişi imzalanıb. Bu addımlar Ankaranın regionda təsir gücünü artırmaq məqsədi daşıyır.
Sözügedən dəniz sazişinin Liviya parlamenti tərəfindən ratifikasiya olunması Şərqi Aralıq dənizində qüvvələr balansını dəyişə bilər. Bu halda Liviyadakı bütün siyasi mərkəzlər Ankaranın mövqeyini qəbul etmiş sayılacaq.
Bu proses artıq Yunanıstanı narahat edib. Afina tərəfi Misiri Hafter administrasiyasını sazişin ratifikasiyasından çəkindirməyə razı salmağa çalışır.
Qeyd edək ki, cəmi bir neçə il əvvəl Hafterin nəzarətində olan şərqi Liviyanın belə bir sazişi nəzərdən keçirməsi belə mümkünsüz görünürdü. Bu dəyişiklik regionda siyasi düzənlərin sürətlə dəyişdiyini göstərir.
Zəhra Ağayeva
10:26 05.06.2025
Oxunuş sayı: 1673
