“SAT sisteminin digər universitetlərdə də tətbiqində ciddi problem olacağını düşünmürəm” – Ekspert
Dünyada ali təhsilə qəbulda beynəlxalq standartlara uyğun qiymətləndirmə sistemlərinin rolu günbəgün artır. Bu baxımdan, ABŞ-da formalaşmış və dünyanın bir çox ölkəsində tanınan "SAT" (Scholastic Assessment Test) sistemi xüsusilə seçilir. SAT imtahanı abituriyentlərin məntiqi təfəkkürünü, dil və riyaziyyat biliklərini obyektiv şəkildə ölçmək məqsədi daşıyır və beynəlxalq səviyyədə qəbul olunan ali məktəblərə girişdə mühüm meyarlardan biri hesab olunur. Bəs bu sistemin Azərbaycanda daha geniş tətbiqi nə dərəcədə məqsədəuyğundur? Xüsusilə "Qarabağ", "Azərbaycan–İtaliya", "Azərbaycan–Türkiyə", "Azərbaycan–Fransa" universitetləri kimi beynəlxalq əməkdaşlıq platformasında fəaliyyət göstərən ali təhsil ocaqlarında SAT sisteminin tətbiqi təhsil keyfiyyətinə hansı töhfələri verə bilər?
Mövzu ilə bağlı təhsil eksperti Elçin Süleymanov Crossmedia.az-a açıqlama verib: “SAT ilə universitetə qəbul təcrübəsi hazırda ADA universitetində uğurla tətbiq olunur.
Digər universitetlərdə də tətbiqində ciddi problem olacağını düşünmürəm. Çünki bir çox ölkədə lokal imtahan və beynəlxalq imtahan nəticələri qəbul üçün əsas ola bilir. Bunun ən yaxşı nümunəsi ADA universitetidir ki, orda artıq illərdir ki, tətbiq olunur. Bu imtahanlar xüsusilə beynəlxalq məktəb məzunlarının universitetlərə daxil olmasına şərait yaradır. Tədirisi ingilis dilində olan universitetlərdə bəzən yerli imtahan məzunlarının müəyyən bal toplayaraq qəbul olması səbəbindən ingilis dillində ən az 40% nəticə göstəricisi olmalıdır. İngilis dilli bir universitet qəbul prosesini dünyada qəbul olunan bir sistemə uyğun keçirərək uğurlu nəticələr əldə edə bilər. Hazərda DİM-də eyni təcrübədən doktorantura imtahanına xarici dil üçün istifadə edir. Xarici dildən imtahan verənlər ya DİM-dən imtahan verməlidir, ya da beynəlxalq səviyyədə qəbul olunan sertifikatları DİM-ə yönləndirirlər və ona uyğun nəticə müəyyənləşdirilir”.
Ayhan Ağarzayev
16:16 30.05.2025
Oxunuş sayı: 10436
