Almaniya Ukraynaya uzaqmənzilli silahlardan sərbəst istifadə icazəsi verdi
Ukrayna bundan sonra Rusiya daxilindəki hədəflərə qarşı da uzaqmənzilli silahlardan istifadə edə biləcək.
Almaniya kansleri Fridrix Merzin açıqlamasına əsasən, artıq Ukraynaya verilmiş uzaqmənzilli silahların istifadəsi ilə bağlı əvvəlki məhdudiyyətlər aradan qaldırılıb. O bildirib ki, bu qərar əslində bir neçə ay əvvəl qəbul edilib və Ukraynanın müdafiə qabiliyyətində “həlledici fərq” yaradacaq.
Crossmedia.az xarici mediaya istinadən bildirir ki, Ukrayna indiyədək ABŞ, Böyük Britaniya, Almaniya və Fransadan aldığı uzaqmənzilli raketləri yalnız işğal olunmuş Ukrayna ərazisindəki Rusiya hədəflərinə qarşı istifadə edə bilərdi. Lakin Almaniyanın son mövqeyi bu məhdudiyyətlərin aradan qalxdığını göstərir.
ATACMS raketləri
ABŞ istehsalı olan Ordu Taktik Raket Sistemləri (ATACMS) 300 km-ə qədər məsafədəki hədəfləri vura bilir. Bu raketlər HIMARS və ya MLRS M270 sistemləri ilə işə salınır. 2023-cü ildə Ukrayna bu silahlarla şərqdəki Rusiya bazalarını vuraraq doqquz helikopteri məhv etmişdi. Rusiya Müdafiə Nazirliyi isə 2024-cü ilin noyabrında ölkə ərazisinə atılan altı ATACMS raketinin vurulduğunu açıqlamışdı.
Storm Shadow / SCALP raketləri
Böyük Britaniya və Fransanın birgə istehsalı olan bu raketlər 250 km-dən çox mənzilə malikdir. Sabit və möhkəmləndirilmiş hədəflərə qarşı yüksək dəqiqliklə zərbə endirmək qabiliyyətinə malikdir. GPS və infraqırmızı sensorlarla təchiz olunub.
Taurus raketləri
Almaniyada istehsal olunan Taurus KEPD 350 raketləri də bu siyahıda yer alır. Onlar 500 km-dən çox məsafədəki bunkerlər, radar sistemləri kimi yüksək qiymətli hədəfləri vura bilir. Merz bu raketlərin Ukrayna ilə birgə istehsalına eyham vuraraq, “Bu, sənaye səviyyəsində əməkdaşlıq olacaq”, – deyə bildirib.
Zəhra Ağayeva
12:45 29.05.2025
Oxunuş sayı: 1081
