“Bu ilki imtahan sualları keçən ilə nisbətən daha çətin, ondan əvvəlki ilə nisbətən daha asandır” – EKSPERT
Hər il abituriyentlər imtahan suallarının çətinliyindən şikayətlənir. Lakin Dövlət İmtahan Mərkəzi sualların formatının olduqca düzgün və məktəbdəki dərs vəsaitlərinə uyğun hazırlandığını bildirir. Bu ildə abituriyentlər blok imtahanında bəzi fənnlərin çox çətin olmasından şikayətləniblər.
Məsələ ilə bağlı təhsil eksperti Elçin Əfəndi Crossmedia.az-a açıqlama verib:
“Blok imtahanları ilə bağlı imtahanların çətin olması bir neçə gündür müzakirə mövzusudur. 2 və 3-cü qrupların tarix imtahanı ilə bağlı çətinliyi əvvəlki illərlə müqayisədə daha artıq idi. Nəticə etibarilə abituriyentlərin də əsas narazılığı bu fənndən oldu. Qarşıdan 1 və 4-cü qrupların birinci blok imtahan cəhdi gəlir. Orda da yenə abituriyentlərdən əsas tələb diqqətdir. Düşünürəm ki, ciddi formatda hazırlaşan abituriyentlər üçün sualların formatının heç bir fərqi yoxdur. Məsləhətim ondan ibarətdir ki, birinci cəhddəki nəticələrdən razı qalmasalar ikinci şans imtahanına mütləq girsinlər. Sualların çətinlik dərəcəsində gəldikdə isə onu deyə bilərəm ki, bu ilki imtahan sualları ötən ilə nisbətən daha çətin, ondan əvvəlki ilə nisbətən isə daha asandır. İldən ilə fərqli suallar təyin olunsa da bunlar ümumi bazadan seçilir”.
Ayhan Ağarzayev
12:08 29.05.2025
Oxunuş sayı: 11477
