Kosovoda parlament böhranı: Kurti hökumətinin gələcəyi sual altındadır
Fevralın 9-da keçirilən seçkilərdən keçən müddətə baxmayaraq, Kosovoda hələ də parlament formalaşmayıb. Bu vəziyyət texniki mandatla fəaliyyət göstərən hökumətin legitimliyi ilə bağlı ciddi suallar doğurur.
Vətəndaş cəmiyyəti təşkilatları Priştinada parlament binası qarşısında keçirilən simvolik aksiyada parlamentin bloklanmasına etirazlarını bildiriblər.
Crossmedia.az xarici mediaya istinadən bildirir ki, nümayiş yeni seçilmiş parlamentin 22-ci dəfə toplaşmaq cəhdindən bir saat əvvəl keçirilib. Aksiya zamanı quraşdırılan rəmzi saatlar seçkilərdən sonra keçən və institusional quruculuqda itirilmiş vaxtı simvolizə edib.
Kosovo Demokratiya İnstitutunun təmsilçisi Eugen Cakoli bildirib ki, məqsəd institusional böhranın normal hal kimi qəbul edilməsinin qarşısını almaqdır. Onun sözlərinə görə, parlamentin işinin iflic olmasına görə bütün siyasi partiyalar məsuliyyət daşıyır.
Baş nazir Albin Kurti və onlarla nazir parlamentdə and içmələrinə baxmayaraq, hələ də vəzifələrini icra edirlər. Etiraz aksiyası zamanı “Hər gecikmənin öz qiyməti var!” və “Demokratiya sirki” şüarları səsləndirilib.
Kosovo Demokratik Liqasının üzvü Hikmete Bayrami bildirib ki, Kurti və keçmiş kabinet üzvlərinə qarşı 17 cinayət işi açılıb. Bayraminin fikrincə, onlar martın 27-dən etibarən Hökumət Aktının 26-cı maddəsini pozurlar.
Kurti və nazirlər parlamentdə and içmədən əvvəl vəzifələrindən istefa verdiklərini bildirsələr də, hüquqşünaslar bunun texniki səlahiyyətlə fəaliyyət göstərmək üçün kifayət etmədiyini bildirirlər.
Apreldə 120 deputat and içsə də, spikerin seçilməməsi səbəbindən Assambleya hələ də fəaliyyətsizdir. Kurti isə mətbuata müsahibəsində “Kosovonun hökuməti var və mən baş nazir kimi fəaliyyət göstərirəm” deyə bildirib.
Bəzi hüquqşünaslar hesab edir ki, parlamentin təsdiqlənmədiyi bir şəraitdə hökumətin qərar verməsi Konstitusiyanın 72-ci maddəsinin pozulmasıdır. Bljerina İstrefi bildirib ki, qəbul edilən 17 qərar qeyri-qanunidir və bu, cinayət məsuliyyəti yarada bilər.
Vətəndaş cəmiyyəti nümayəndələri parlamentin 9-cu sessiyası çağırılanadək etirazları davam etdirəcəklərini açıqlayıblar.
Kurtinin rəhbərlik etdiyi “Vetevendosje!” partiyası seçkilərdə 48 mandat əldə edib. Bu, təkbaşına hökumət qurmaq üçün yetərli deyil. Müxalifət partiyaları ilə koalisiya ehtimalı isə hələlik görünmür.
Zəhra Ağayeva
12:18 29.05.2025
Oxunuş sayı: 8231
