Rusiyanın Ukrayna ilə barış görüşlərinin ikinci turu İstanbuldadır
Rusiya Ukrayna ilə müharibəni bitirmək üçün ikinci tur barış danışıqlarının 2 iyun tarixində İstanbulda keçirilməsini təklif edib. Rusiya Xarici İşlər Naziri Sergey Lavrov açıqlayıb ki, Kremlin nümayəndələri Ukrayna ilə yeni müzakirələrə hazırdır və Moskva müharibənin əsas səbəblərini əhatə edən bir memorandum hazırlayıb.
Crossmedia.az xarici mediaya istinadən bildirir ki, Lavrovun sözlərinə görə, Rusiya memorandumda “krizin əsas səbəbləri” kimi adlandırılan məsələlərin həlli yollarını təqdim edib. O əlavə edib ki, Rusiya nümayəndə heyəti memorandumda yer alan mövqeləri Ukrayna tərəfinə təqdim etməyə və İstanbulda keçiriləcək müzakirələrin ikinci turunda bu mövzuları müzakirə etməyə hazırdır. Bu açıqlama Türkiyə Xarici İşlər Naziri Hakan Fidanın Moskvaya iki günlük səfəri zamanı Lavrov və Prezident Vladimir Putinlə görüşündən sonra gəlib. Lavrov həmçinin Türkiyəyə müzakirələr üçün platforma yaratdığına görə təşəkkürünü bildirib.
Lavrov Rusiyanı barış istəyində ciddi olmamaqda ittiham edənlərə də cavab verib və ümid etdiyini söyləyib ki, barış prosesinə səmimi yanaşan hər kəs İstanbulda keçiriləcək yeni danışıqları dəstəkləyəcək.
Bu arada, ABŞ Prezidenti Donald Tramp barış prosesinə dair qarışıq siqnallar verib. Tramp jurnalistlərə bildirib ki, Rusiya Prezidenti Vladimir Putinin Ukraynaya hücumları artırmaq qərarından çox məyusdur. Tramp “Danışıqların ortasında insanların öldürüldüyü bir hadisə baş verdi və bu məni çox üzdü” deyib.
Buna baxmayaraq, Tramp Rusiyaya qarşı yeni sanksiyaların tətbiqini təxirə salıb. O bunu barış danışıqlarının uğuruna mane olmamaq məqsədi ilə etdiyini bildirib. ABŞ Prezidenti əlavə edib ki, Rusiyanın barış istəməsi və səmimiliyi iki həftə ərzində aydın olacaq. Əgər Moskvanın səmimi olmadığı ortaya çıxsa, Vaşinqtonun Moskva ilə münasibətlərində dəyişiklik gözlənilir.
Fatimə Nəbiyeva
12:13 29.05.2025
Oxunuş sayı: 1159
