Şəhid ailələri Türkiyənin Çanaqqala şəhərini ziyarət ediblər
"Zəfər" Şəhid Ailələrinə Dəstək İctimai Birliyi və Türk Əməkdaşlıq və Koordinasiya Agentliyinin (TİKA) təşkilatçılığı, "Azərbaycan Hava Yolları" QSC-nin tərəfdaşlığı ilə şəhidlərin ailə üzvlərindən ibarət olan 30 nəfərlik heyət Türkiyənin Çanaqqala şəhərini ziyarət edib.
Crossmedia.az xəbər verir ki, səfərin ilk günündə “57-ci Alay Şəhidliyi”, “Çanaqqala Şəhidlər Abidəsi”, “Troya Atı Muzeyi”, “Dəniz Muzeyi” və “Seyit Onbaşı Abidəsi” ziyarət olunub.
Şəhidlərin ailə üzvləri həmin tarixi məkanlarda həlak olanların ruhuna dualar oxuyub, Çanaqqalada yerləşən Azərbaycan şəhidlərinin xatirəsinə ucaldılmış abidəni ziyarət ediblər.
Səfərin ikinci günü Çanaqqala şəhərinin valisi Ömer Toraman şəhid ailələrini qəbul edib. O, Azərbaycandan olan şəhid ailələrini şəhərlərində görməkdən məmnunluq duyduğunu bildirib və səfərin iki qardaş xalq arasında mövcud dostluq və ortaq dəyərlərin daha da möhkəmləndirilməsi baxımından əhəmiyyətini vurğulayıb.
Nümayəndə heyəti şəhərdəki “Atatürk Abidəsi”, “Zəfər Muzeyi”, “Hisart Canlı Tarix Muzeyi” və “Nusret Mayın Gəmisi”ni ziyarət edib.
Sonra Çanaqqala Şəhid Ailələri və Qazilər Dərnəyi ilə görüş keçirilib. Görüş zamanı iki qardaş ölkənin şəhid ailələrini bir araya gətirən layihələrin davam etdirilməsi və gələcəkdə əməkdaşlığın genişləndirilməsi ilə bağlı fikir mübadiləsi aparılıb.
Qeyd edək ki, dördgünlük səfər çərçivəsində şəhid ailələri tarixi və mənəvi baxımdan əhəmiyyətli olan məkanlara baş çəkəcək, Azərbaycanın və Türkiyənin ortaq tarixində iz qoymuş qəhrəmanları yad edəcəklər.
12:15 07.05.2025
Oxunuş sayı: 10222
