ABŞ Nümayəndələr Palatası Gürcüstanla bağlı “MEGOBARI Act” qanun layihəsini qəbul edib
ABŞ Nümayəndələr Palatası Gürcüstanla bağlı “MEGOBARI Act” adlı qanun layihəsini 349 lehinə, 42 əleyhinə səslə qəbul edib. Layihənin adı olan “MEGOBARI” gürcü dilində “dost” mənasını verir və tam açılışı “Mobilizing and Enhancing Georgia’s Options for Building Accountability, Resilience and Independence” (Hesabatlılıq, Davamlılıq və Müstəqillik üçün Gürcüstanın Seçimlərini Səfərbər Etmək və Gücləndirmək) formasındadır.
Crossmedia.az xarici mediaya istinadən xəbər verir ki, qanun layihəsi Çin Kommunist Partiyası, İran rejimi və Rusiya Federasiyasının Gürcüstandakı təsirinə qarşı yönəlib. Layihə ABŞ-ın Gürcüstanda demokratik dəyərləri, insan haqlarını və qanunun aliliyini qorumaq siyasətini rəsmiləşdirir və bu prinsiplərin ABŞ maraqları üçün vacibliyini vurğulayır.
Layihədə Gürcüstanda demokratik seçkilərin keçirilməsi, müxalifətə təzyiqlərin azaldılması, insan hüquqlarına hörmət, həmçinin Rusiya və Çinlə yaxınlaşmadan imtina kimi məsələlər qeyd olunub. Qanun, ABŞ-Gürcüstan münasibətləri baxımından hüquqi çərçivə statusu alır.
Gürcüstan tərəfi layihədə qeyd olunan şərtlərə əməl edəcəyi təqdirdə, ABŞ tərəfindən bir sıra güzəştlər və dəstəklər nəzərdə tutulur. Bunlara əlverişli ticarət sazişinin imzalanması, viza rejiminin sadələşdirilməsi, iqtisadi yardım paketi və modernizasiya proseslərinə dəstək daxildir.
Qanun layihəsində Gürcüstan vətəndaşları üçün ABŞ-yə səfərlərdə viza prosedurlarının asanlaşdırılması, iş adamlarına vizaların daha sürətli verilməsi kimi konkret tədbirlər də yer alır.
Qanun layihəsi növbəti mərhələdə ABŞ Senatında təsdiq olunmalı və daha sonra imzalanmaq üçün Prezident Donald Trampa təqdim ediləcək.
Mədinə Cəlilova
19:54 06.05.2025
Oxunuş sayı: 7421
