“I am jazzman 2025” beynəlxalq müsabiqəsi qala-konsertlə başa çatıb
M.Maqomayev adına Azərbaycan Dövlət Akademik Filarmoniyasının Kamera və Orqan Musiqisi Zalında “I am jazzman 2025” gənc ifaçılar müsabiqəsinin finalçılarının mükafatlandırma mərasimi və qala-konserti olub. “I am jazzman” müsabiqəsi yeni ulduzları üzə çıxarır və gənc istedadlara öz bacarıqlarını böyük səhnədə nümayiş etdirmək şansı verir.
Müsabiqənin builki qalibləri pianoçu Nurlan Hüseynzadə və vokalçı Elton Səlimov olublar. Müsabiqənin qalibləri və finalçıları diplom və qiymətli hədiyyələrlə mükafatlandırılıblar. Bu il müsabiqə iki seçmə mərhələdən və həm vokalçıların, həm də instrumental ifaçıların çıxış etdiyi final mərhələsindən ibarət olub.
Münsiflər heyətinə Bakı Caz Festivalının təsisçisi və direktoru, Azərbaycanın Əməkdar artisti Rain Sultanov, milli klassik estradanın korifeyi Qasım Xəlilov, “Eurovision 2017” iştirakçısı, Azərbaycanın aparıcı caz vokalisti Diana Hacıyeva, “I am jazzman” müsabiqəsinin direktoru, Azərbaycanda ilk caz jurnalı olan “Jazz dünyası”nın, həmçinin ölkənin caz düşərgəsi layihəsinin baş redaktoru Leyla Əfəndiyeva daxil olublar.
“I am jazzman” beynəlxalq müsabiqəsi 2006-cı ildə Leyla Əfəndiyeva tərəfindən Bakı Caz Festivalı əsasında təsis edilib və gənc caz musiqiçiləri üçün əsas caz platformasına çevrilib. Müsabiqənin məqsədi cazı peşəkarcasına və ruhu ilə ifa edən istedadlı gənc musiqiçiləri tapmaqdır.
09:07 03.05.2025
Oxunuş sayı: 805
