Netanyahu geri çəkildi – Şin-Bet rəhbərinin taleyinə Ali Məhkəmə möhür vurdu
İsrailin Baş naziri Benyamin Netanyahu ölkənin daxili təhlükəsizlik xidməti olan Şin-Betin (Şabak) direktoru Ronen Barın vəzifədən azad edilməsinə dair qərarı geri çəkib.
Crossmedia.az İsrail mediasına istinadən xəbər verir ki, qərar, Barın 15 iyun tarixində istefa verəcəyini açıqlamasından sonra verilib.
İsrailin dövlət yayımçısı KAN-ın məlumatına görə, Netanyahu Barı “etimadsızlıq” səbəbi ilə vəzifədən uzaqlaşdırmaq istəsə də, bu addım İsrail Ali Məhkəməsi tərəfindən bloklanıb. Məhkəmə, hökumətin Şin-Betə yeni direktor təyin etməsinə müvəqqəti məhdudiyyət qoyub və məsələyə dair yekun qərarın gözlənildiyini bildirib.
Ronen Bar keçən həftə məhkəməyə təqdim etdiyi izahatda Netanyahuya qarşı sərt ittihamlar səsləndirib. O, baş naziri şəxsi maraqları naminə Şin-Bet qurumundan istifadə etməyə çalışmaqda günahlandırıb.
Netanyahu isə Barı 7 oktyabr 2023-cü ildə baş verən və ölkə tarixində ən ciddi kəşfiyyat uğursuzluğu hesab edilən hadisəyə görə məsuliyyət daşımaqda ittiham edib.
Şin-Bet qərargahında keçirilən daxili tədbirdə çıxış edən Ronen Bar, həmin uğursuzluğa görə məsuliyyəti üzərinə götürdüyünü və iyunun 15-də vəzifədən gedəcəyini təsdiqləyib.
Hazırda Ali Məhkəmənin mövcud qərarı qüvvədə qalmaqda davam edir və hökumət yeni təyinatla bağlı addım ata bilmir. İsrail cəmiyyətində geniş rezonansa səbəb olan bu hadisənin hüquqi və siyasi nəticələri diqqətlə izlənilir.
Aybəniz Səfərova
21:32 29.04.2025
Oxunuş sayı: 855
