Rusiya və Ukraynadan kütləvi dron hücumları
Rusiya və Ukrayna arasında gecə saatlarında həyata keçirilən qarşılıqlı hava hücumları nəticəsində Ukraynada 1 nəfər həlak olub, 24 nəfər yaralanıb.
Crossmedia.az xəbər verir ki, bu barədə hər iki ölkənin rəsmi qurumları məlumat yayıb.
Ukraynanın cənubundakı Xerson vilayətinə endirilən Rusiya zərbəsi nəticəsində 1 nəfər həlak olub, 19 nəfər xəsarət alıb. Bu barədə vilayət hərbi administrasiyasının rəhbəri Oleksandr Prokudin “Telegram” hesabında bildirib.
Zaporojye vilayətində isə yaşayış məntəqəsinə edilən hücum zamanı 5 nəfər yaralanıb. Vilayət hərbi administrasiyasının rəhbəri Mixaylo Semikinin sözlərinə görə, hücum nəticəsində çoxmərtəbəli yaşayış binalarına ziyan dəyib, dayanacaqda olan avtomobillərdə yanğın baş verib.
Ukrayna Hərbi Hava Qüvvələri Rusiyanın gecə ərzində ölkəyə 330-dan çox pilotsuz uçuş aparatı və raketlə hücum etdiyini açıqlayıb. Bildirilib ki, hava hücumundan müdafiə sistemləri 293 hava hədəfini məhv edib və ya zərərsizləşdirib.
Rusiya Müdafiə Nazirliyi isə Krivoy Roq, Zaporojye və Jitomir şəhərlərində metallurgiya müəssisələrinə, transformator istehsalı zavoduna və enerji infrastrukturuna kütləvi zərbələr endirildiyini bildirib.
Nazirliyin məlumatına görə, Rusiya hava hücumundan müdafiə qüvvələri ölkə ərazisi, 2014-cü ildə Rusiya tərəfindən ilhaq edilmiş Krım yarımadası və Qara dəniz üzərində Ukraynaya məxsus 610 pilotsuz uçuş aparatını vurub.
Qeyd edək ki, müharibə şəraitində tərəflərin açıqladığı məlumatların müstəqil şəkildə təsdiqlənməsi mümkün olmayıb.
10:46 17.10.2026
Oxunuş sayı: 51
