İsrail, iki fransız heyətinin ölkəyə girişinə icazə vermədi: Parisdən sərt reaksiya
Fransa Xarici İşlər Nazirliyi, İsrailin iki fransız heyətinin ölkəyə səfərini əngəlləməsinə və bu qrupların “terror təşkilatı” ilə əlaqəli olduğu iddiasına kəskin reaksiya verib. Nazirlik, İsraildəki Fransa Səfirliyinin davranışını “qəbulolunmaz” olaraq qiymətləndirib.
Crossmedia.az İsrail Səfirliyinin bazar ertəsi günü verdiyi açıqlamaya istinadən xəbər verir ki, Filistin üçün Mərkəzsiz Əməkdaşlıq Şəbəkəsi və Fransa-Fələstin Həmrəylik Assosiasiyası (AFP) ilə əlaqəli heç bir şəxsin və ya heyətin İsrailə girişinə icazə verilməyəcəyini bildirmiş, bu təşkilatların Fələstin Xalq Azadlıq Cəbhəsi ilə əlaqəsi olduğunu iddia etmişdi. Qeyd olunan qrup ABŞ və Avropa İttifaqı tərəfindən “terror təşkilatı” kimi tanınır.
Fransa Xarici İşlər Nazirliyi, İsrailin seçilmiş fransız rəsmilərinin də daxil olduğu iki heyətə verilmiş icazəni ləğv etməsini “təəssüf doğuran və ikitərəfli münasibətlərə zərər verəcək bir addım” kimi dəyərləndirib.
Nazirliyin açıqlamasında, “Fransadakı İsrail Səfirliyinin bu təşkilatlarla terror qrupları arasında əlaqə olduğunu iddia etməsi və bunu açıq şəkildə ictimaiyyətə elan etməsi qəbuledilməzdir” deyə vurğulanıb və İsrail hökumətinə bu qərardan geri çəkilmək çağırışı edilib.
Fransa Prezidenti Emmanuel Makronun aprel ayı əvvəlində ölkəsinin Fələstin dövlətini tanıya biləcəyi ilə bağlı verdiyi açıqlamadan sonra Paris-Tel-Əviv münasibətləri gərginləşmişdi.
İsrail Səfirliyi son açıqlamasında həm yerli, həm də beynəlxalq hüquqa əsaslanaraq hərəkət etdiklərini, bu hüququn onlara “İsrailin varlığını legitimləşdirməyən və təhlükəsizliyini sarsıtmaq istəyən təşkilatların nümayəndələrinin ölkəyə girişini əngəlləmək hüququ” verdiyini bildirib.
Bəyanatda heyət üzvlərinə “əgər terroru dəstəkləməyən bir təşkilat tərəfindən təşkil edilən bir səfər istəyirlərsə, İsrail Səfirliyi ilə əlaqə qurmaları” tövsiyə edilib.
Mədinə Cəlilova
22:15 29.04.2025
Oxunuş sayı: 9140
