Qırğızıstan-Tacikistan sərhədində təhlükəsizlik tədbirləri gücləndirilir
Qırğızıstan Tacikistanla sərhəddə genişmiqyaslı mühəndis işlərinə start verib. Qırğızıstanın Sərhəd Xidməti məlumat yayıb ki, dövlət sərhədinin Qırğızıstan-Tacikistan hissəsində təhlükəsizlik və sabitliyi artırmaq məqsədilə Batken vilayətində mühüm infrastruktur işlərinə başlanılıb.
Crossmedia.az xarici mediaya istinadən bildirir ki, əməliyyatlar Qırğızıstan, Tacikistan və Özbəkistanın kəsişdiyi strateji nöqtədən – üç ölkənin sərhədlərini göstərən stela quraşdırılmış ərazidən başlayıb. Burada sərhədin möhkəmləndirilməsi istiqamətində fəal mərhələyə keçilib, bu da bölgədə sabitliyin qorunmasına yönəlib. Ərazidə müasir sahə düşərgəsi qurulub, xüsusi texnika gətirilib və hərbçilərin rahat yaşayışı və xidməti üçün zəruri şərait yaradılıb.
Sərhədin mühafizəsinin gücləndirilməsi layihəsi çərçivəsində ilkin mərhələdə 420 kilometr uzunluğunda müdafiə sədləri inşa ediləcək. Bəzi hissələrdə 3D torlar, tikanlı məftillər və “Egoza” adlı xüsusi məftil qurğuları yerləşdiriləcək. Eyni zamanda, çoxsəviyyəli sərhəd mühafizə sisteminin tərkib hissəsi olaraq tank əleyhinə xəndəklərin qazılması da nəzərdə tutulur.
Qırğızıstan rəsmiləri bu tədbirlərin yalnız müdafiə və sabitlik məqsədi daşıdığını bildirir. Layihənin növbəti mərhələlərində sərhəd boyunca nəzarət mexanizmlərinin daha da təkmilləşdirilməsi planlaşdırılır.
Fatimə Nəbiyeva
18:50 29.04.2025
Oxunuş sayı: 10013
