Deputat: "İşğaldan azad olunmuş ərazilərə səfərlər siyasi həmrəyliyin təzahürüdür"
"İşğaldan azad olunmuş ərazilərə səfərlər siyasi həmrəyliyin təzahürüdür".
Bunu siyasi partiya nümayəndələrinin Laçına səfəri ilə bağlı Crossmedia.az-ın əraziyə ezam olunmuş əməkdaşına açıqlamasında Milli Məclisin deputatı, Milli İstiqlal Partiyasının sədri Arzuxan Əlizadə bildirib.
O deyib ki, belə səfərlər təkcə işğaldan azad olunmuş əraziləri ziyarət məqsədi daşımır, həm də Azərbaycanın yeni dövr siyasi həyatında formalaşan həmrəylik mühitinin təzahürüdür. Onun sözlərinə görə, Laçına təşkil olunan bu səfərlər həm dövlətlə cəmiyyət, həm də müxtəlif siyasi qütblər arasında dialoqun möhkəmləndirilməsi baxımından mühüm rol oynayır: "30 ilə yaxın müddətdə torpaqların işğal altında qalması xalqın ən böyük ağrısı olub. Ən böyük istəyimiz və hədəfimiz bu torpaqları azad görmək idi. 2020-ci ildə İkinci Qarabağ müharibəsində əldə etdiyimiz zəfərdən sonra ilk arzumuz Vətən torpaqlarını ziyarət etmək oldu. Lakin minalar, yararsız yollar və digər infrastruktur problemləri buna imkan vermirdi. Artıq bərpa prosesi mərhələli şəkildə həyata keçirilir və bu səfərlər reallaşır”.
A. Əlizadə vurğulayıb ki, Prezident Administrasiyasının siyasi partiyalarla iş üzrə şöbəsinin təşkilatçılığı ilə baş tutan bu səfərlər ölkədə siyasi dialoqun və əməkdaşlığın nümunəsidir: “Siyasi partiya rəhbərlərinin, millət vəkillərinin və ekspertlərin birgə iştirakı həm təəssüratların paylaşılması, həm də münasibətlərin yaxınlaşması baxımından əhəmiyyətlidir. Bu, Prezident İlham Əliyevin 2020-ci ildən sonra qurduğu yeni siyasi münasibətlər sisteminin davamıdır və effektivliyini artıq sübut edib”.
Deputat əlavə edib ki, 44 günlük Vətən müharibəsi dövründə bütün ictimai-siyasi spektr vahid mövqedən çıxış etdi və xalq siyasi baxışından asılı olmayaraq bir yumruq kimi birləşdi: “Bu birlik qələbənin əsas səbəblərindən biri oldu. Biz bu yolla həm daxili həmrəyliyimizi, həm də xaricə güclü mesaj verdik”.
Parlamentari sonda bildirib ki, işğaldan azad olunmuş ərazilərdə bərpa işləri intensivləşdikcə bu cür səfərlərin sayı da artacaq.
Kənan Novruzov
13:37 29.04.2025
Oxunuş sayı: 912
