Türkiyə Pakistana hərbi təyyarə göndərilməsi barədə iddiaları rədd etdi
Türkiyə Prezidenti Administrasiyası yanında Dezinformasiyaya qarşı Mübarizə Mərkəzi, Pakistana 6 hərbi təyyarə göndərilməsi ilə bağlı yayılan məlumatların həqiqəti əks etdirmədiyini açıqlayıb. Qurumun yaydığı bəyanatda bildirilir ki, yayılan iddialar tamamilə əsassızdır və ictimaiyyətdə çaşqınlıq yaratmağa yönəlib.
Crossmedia.az xarici mediaya istinadən bildirir ki, məsələ ilə bağlı yayılan açıqlamada təyyarənin Pakistanda yalnız yanacaq doldurmaq üçün eniş etdiyi qeyd olunub. Hər hansı bir hərbi məqsəd və ya dəstək məqsədilə Pakistana avadanlıq göndərilməsi halının olmadığı xüsusi vurğulanıb.
Qeyd edək ki, bu məlumatı günün əvvəlində bəzi Türkiyə mediası yayıb. Həmin xəbərlərdə Pakistan rəsmilərinin Türkiyəyə “səssiz, lakin real dəstək” verdikləri iddia olunurdu. Lakin Türkiyə rəsmiləri bu cür xəbərlərin yanlış olduğunu, ictimaiyyəti çaşdırmamaq üçün yalnız rəsmi mənbələrə istinad edilməsinin vacibliyini xatırladıblar.
Mərkəz, dezinformasiyaya qarşı mübarizənin davam etdiriləcəyini və doğru informasiya axınının təmin olunması üçün cəmiyyətin diqqətli olmasının vacibliyini bir daha vurğulayıb.
Fatimə Nəbiyeva
21:26 28.04.2025
Oxunuş sayı: 8626
