Avropada genişmiqyaslı elektrik kəsintisi: Bir neçə ölkə işıqsız qaldı
2025-ci il 28 aprel tarixində Avropanın bir neçə ölkəsində elektrik enerjisi təchizatında ciddi problemlər yaşanıb. “La Vanguardia” nəşrinin məlumatına görə, İspaniya və Portuqaliya ilə yanaşı, Andorra, Belçika və Fransanın bəzi ərazilərində də genişmiqyaslı işıq kəsintisi baş verib. İlkin məlumata görə, qəzanın səbəbləri hələ müəyyən edilməyib və araşdırmalar davam edir.
İspaniyada bəzi xəstəxanalarda elektrik enerjisinin olmaması səbəbindən kritik vəziyyət yaranıb. Madridin Baraxas hava limanı fəaliyyətini dayandırmaq məcburiyyətində qalıb. Portuqaliyada isə internet xidmətlərində fasilələr müşahidə olunub, Lissabon metrosu tamamilə fəaliyyətini dayandırıb. Böyük şəhərlərdə yaranan tıxaclar əhalinin hərəkətini çətinləşdirib və vəziyyətin daha da ağırlaşmasına səbəb olub.
Crossmedia.az xarici mediaya istinadən bildirir ki, İspaniya və Portuqaliyanın enerji sistemləri bu qəza nəticəsində 10 qiqavatdan artıq güc itirib. Nəşr qeyd edir ki, bu, Avropanın müasir tarixində qeydə alınan ən iri enerji kəsintilərindən biridir. Elektrik şəbəkələrindəki nasazlıq milyonlarla insanın gündəlik həyatına təsir edib.
Rəsmi qurumlar hadisənin dəqiq səbəblərini araşdırmaq və mümkün qədər tez bir zamanda enerjinin bərpasını təmin etmək üçün fəaliyyət göstərirlər. Elektrik enerjisi təchizatının tam bərpası üçün bütün imkanlar səfərbər olunub. Enerji şirkətləri və fövqəladə hallar xidmətləri vəziyyətə nəzarət etməyə çalışırlar.
Hazırda vəziyyət sabitləşməyib və bəzi ərazilərdə elektrik enerjisi hələ də bərpa olunmayıb. Hakimiyyət orqanları əhaliyə səbirli olmağı tövsiyə edir və elektrik enerjisi təminatının bərpası ilə bağlı əlavə məlumatların veriləcəyini bildirir. Hadisə ilə bağlı araşdırmanın nəticələri yaxın günlərdə açıqlanacaq.
Fatimə Nəbiyeva
19:00 28.04.2025
Oxunuş sayı: 896
