Xarici xəbərlər

Şimali Koreya Rusiyaya əsgər göndərdiyini ilk dəfə təsdiqlədi

Şimali Koreya bazar ertəsi günü ilk dəfə olaraq Rusiyaya Ukrayna ilə müharibədə kömək məqsədilə əsgər göndərdiyini etiraf edib. İndiyədək Moskva və Pxenyan bu məsələ ilə bağlı Cənubi Koreya və Qərb ölkələrinin iddialarına qeyri-müəyyən cavablar verirdi.

İşçi Partiyasının Mərkəzi Hərbi Komissiyasının yaydığı açıqlamada bildirilir ki, Şimali Koreya lideri Kim Çen In qarşılıqlı müdafiə sazişi çərçivəsində Rusiyaya əsgər göndərib.

Crossmedia.az xarici mediaya istinadən bildirir ki, dövlət mediası qərarın Ukraynanın işğal olunmuş ərazilərinin “azad edilməsinə” mühüm töhfə verdiyini iddia edib. Kim Çen In isə “ədalət uğrunda vuruşan hər kəsin qəhrəman olduğunu” deyib.

Rusiya ordusu şənbə günü bəyan edib ki, ötən il Ukraynanın hücumu nəticəsində nəzarəti itirilən Kursk bölgəsindəki bütün ukraynalı əsgərlər çıxarılıb. Rusiyanın Baş Qərargah rəisi Valeri Gerasimov da Şimali Koreya əsgərlərinin bölgədə Ukrayna qüvvələrinə qarşı döyüşdüyünü təsdiqləyib.

Qeyd edək ki, ötən payızda Ukrayna, ABŞ və Cənubi Koreya Şimali Koreyanın Rusiyaya 10-12 min arası əsgər göndərdiyini iddia etmişdi. Moskva və Pxenyan isə indiyədək bu iddialara aydın cavab verməmiş, yalnız əməkdaşlıqlarının beynəlxalq hüquqa uyğun olduğunu bəyan etmişdi.

Fatimə Nəbiyeva

🖨 Çap et

12:10 28.04.2025

Oxunuş sayı: 800