Mingəçevir Dövlət Universiteti və Türkiyənin Düzcə Universitetinin təşkilatçılığı ilə Beynəlxalq Enerji Forumu keçirilib
Mingəçevir Dövlət Universiteti (MDU) və Türkiyənin Düzcə Universitetinin birgə təşkilatçılığı ilə keçirilən I Beynəlxalq Enerji Forumu Düzcə Universitetinin ev sahibliyi ilə öz işinə başlayıb. Forumun əsas məqsədi enerji istehsalı sahəsindəki innovasiyaların müzakirəsi, təmiz enerjiyə keçid proseslərinin təhlili və bu sahədə beynəlxalq əməkdaşlıq imkanlarının araşdırılmasıdır.
Açılış hissəsində Düzcə Universitetinin rektoru Nedim Sözbir və Mingəçevir Dövlət Universitetinin rektoru Anar Eminov çıxış ediblər.
Rektor Anar Eminov universitetlərarası əməkdaşlıq imkanlarının daha da genişlənməsinə ümid etdiyini bildirərək, növbəti – II Beynəlxalq Enerji Forumunun Mingəçevirdə keçirilməsinin məmnunluq doğuracağını qeyd edib.
Düzcə Universitetinin rektoru Nedim Sözbir belə bir forumun keçirilməsini iki universitet arasında əməkdaşlığın bariz nümunəsi kimi qiymətləndirib.
Açılış mərasimindən sonra forum plenar iclaslarla davam edib. Tədbirdə Düzcə Universiteti və Mingəçevir Dövlət Universitetinin alimləri ilə yanaşı, müxtəlif yerli və xarici ali təhsil müəssisələrinin nümayəndələri, həmçinin Türkiyənin aparıcı enerji şirkətlərinin rəhbərləri məruzələrlə çıxış ediblər.
Məruzələrdə ölkəmizin enerji istehsalı və ixracatı, bərpa olunan enerji resurslarının inkişafı, eləcə də işğaldan azad olunmuş ərazilərin enerji potensialı kimi aktual məsələlər əhatə olunub.
09:42 18.04.2025
Oxunuş sayı: 9083
