“Milli H-index Reytinq cədvəlində tədqiqatçıların monitorinqi” mövzusunda elmi-praktik seminar keçirilib
Aprelin 16-da Azərbaycan Dillər Universitetində Elmi Kitabxana və İnformasiya Xidməti Mərkəzi ilə Elm şöbəsinin birgə təşkilatçılığı ilə “Milli H-index Reytinq cədvəlində tədqiqatçıların monitorinqi” mövzusunda elmi-praktik seminar keçirilib. Tədbir universitetin professor-müəllim heyəti üçün nəzərdə tutulub.
Seminarı giriş sözü ilə açan Elmi Kitabxana və İnformasiya Xidməti Mərkəzinin direktoru Cəmilə Əliyeva H-indeksi haqqında məlumat verərək, bu göstəricinin elmi fəaliyyətin təsirini və məhsuldarlığını ölçmək üçün istifadə edilən mühüm metrik olduğunu bildirib. O, H-indeksinin “Milli H-index Reytinq” sistemi tərəfindən ilin hər rübü üzrə elmi nəticələr əsasında hesablandığını vurğulayıb.
Qeyd olunub ki, Azərbaycanda fəaliyyət göstərən elmi qurumların və universitetlərin H-indeks göstəricilərinə əsasən reytinq sıralamaları hazırlanarkən minlərlə alim və mütəxəssisin profilləri, eləcə də elmi nəşrlər təhlil edilir. Bu analizlər “Web of Science”, “Scopus” və “Google Scholar” kimi beynəlxalq elmi platformaların məlumatları əsasında aparılır.
Cəmilə Əliyeva çıxışında, Sosial və Humanitar sahədə yüksək istinad toplamış və ən yüksək H-indeksə malik akademiklərdən biri olan Kamal Abdullanın 2025-ci ilin 16 aprel tarixinə 487 elmi istinadla 18 H-indeksə sahib olduğunu qeyd edib. Bildirilib ki, onun “Abdulla, K. (1991). Gizli Dədə Qorqud kitabı” adlı əsəri 67 elmi istinadla xüsusi diqqət çəkir.
Akademik Kamal Abdulla həmçinin bir sıra sahələr üzrə beynəlxalq indekslərdə yüksək mövqelərdə yer alır. Belə ki, o, “Azerbaijani literature” istiqamətində qeydiyyatdan keçmiş 10 alim arasında birinci, “Azerbaijani linguistics” üzrə iki alimdən biri olaraq lider mövqedə, “Azerbaijani mythology” istiqamətində isə birinci sıradadır.
Seminarda İnformasiya xidməti və Rəqəmsallaşdırma şöbəsinin Analitik İnformasiya Xidmətləri bölməsinin əməkdaşı, tarix üzrə fəlsəfə doktoru, dosent Pərviz Kazımi yüksək indeksli nəşrlərə məqalə göndərilmə meyarları, elmi əsərlərin nüfuzlu jurnallarda dərc edilməsi, elmmetrik platformalarda profil yaradılması və bu profillərin davamlı izlənilməsi mövzusunda geniş təqdimatla çıxış edib.
Tədbirdə Elm və İnnovasiya məsələləri üzrə prorektor Həmidə Əliyeva Milli H-indeksinin əhəmiyyətini vurğulayaraq bildirib ki, bu sahədə maarifləndirmə işləri, elmi bazaların imkanlarından istifadə və beynəlxalq əməkdaşlığın genişləndirilməsi məqsədilə mütəmadi təlimlərin təşkili vacibdir.
Seminar hibrid formada keçirilib. Tədbirdə 28-dən çox müəllim canlı, 88-ə yaxın professor-müəllim heyəti isə onlayn şəkildə iştirak edib.
Seminar sual-cavab sessiyası ilə yekunlaşıb.
09:33 17.04.2025
Oxunuş sayı: 10487
