Prezidentin Sərəncamı Azərbaycan elminə verilən yüksək dəyərin göstəricisidir - Tarixçi alim
Prezident İlham Əliyev Azərbaycan elminin inkişafında xidmətləri olan şəxslərin təltif edilməsi haqqında Sərəncam imzalayıb. Təltif edilən alimlərin içərisində tarix üzrə fəlsəfə doktoru, AMEA A. A. Bakıxanov adına Tarix və Etnologiya İnstitutunun "Qərbi Azərbaycan tarixi" şöbəsinin müdiri Cəbi Əmirvar oğlu Bəhramov da yer alıb. Cəbi Bəhramov “Tərəqqi” medalı ilə təltif olunub.
Prezidentin Sərəncamı ilə bağlı Crosmedia.az-a açıqlamasında Cəbi Bəhramov bildirib ki, Prezidentin Azərbaycan elminə və Milli Elmlər Akademiyasına göstərdiyi diqqət və qayğı hər bir alimin əməyinə verilən yüksək qiymətdir:
“Cənab Prezident Azərbaycan Milli Elmlər Akademiyasının 80 illik yubileyi ilə bağlı bu sahədə çalışan alimləri təltif edib və onların içərisində mənim də adım var. Mən “Tərəqqi” medalı ilə təltif olunmuşam. Bu sərəncam bilavasitə Azərbaycan dövlət başçısının Azərbaycan elminə, Milli Elmlər Akademiyasına göstərdiyi diqqətdir, qayğıdır. Hər birimizin əməyinə verilən yüksək qiymətdir. Ona görə də mən ilk növbədə, cənab Prezidentə öz dərin təşəkkürümü bildirirəm. Onu da qeyd edim ki, onun Qərbi Azərbaycanla bağlı söylədiyi fikirlər, tarixi xəritələrlə bağlı və bu xəritələrdə Göyçə gölünün olması məsələsi, ümumiyyətlə, Azərbaycan milli tarixinin problemləri ilə bağlı dediyi fikirlər bizim qarşımızda qoyulan mühüm bir vəzifədir. Buna görə də bu vəzifələrin yerinə yetirilməsi, xüsusilə də Qərbi Azərbaycan tarixinin tədqiqi üçün əlimizdən gələn nə varsa, onu etməyə hazırıq.
Onun Azərbaycan dili ilə bağlı söylədiyi fikirlər mənim ürəyimcə oldu. Çünki son illərə baxanda Azərbaycan dilinə çox böyük müdaxilələr olub, başqa xalqların dillərini götürən sözlər heç bir elmi əhəmiyyət kəsb etmədən istifadə edilir. Bu da bizim dilimizin zəifləməsinə, onun bəsit şəkil almasına gətirib çıxarır. Bu, yol verilməzdir. Ona görə də cənab Prezidentin bu işə nəzarət etməsi çox böyük bir məqamdan xəbər verir. Bu məsələləri qaldırdığına və bir vəzifə olaraq alimlər qarşısında qoyduğu tapşırığa görə cənab Prezidentə təşəkkür edirəm. Mənim əməyimi də qiymətləndirdiyi üçün ona minnətdarlığımı bildirirəm. Sağ olsun, var olsun. Biz bundan sonra da dövlətimizin, xalqımızın, millətimizin gələcəyi üçün elm sahəsində əlimizdən nə gəlirsə, onu etməyə həmişə hazırıq”.
Günel Verdiyeva
15:51 06.11.2025
Oxunuş sayı: 2115
