Əgər biz 4 il ərzində qurultayı keçirməsək partiyanın hüquqi statusu şübhə altına düşə bilər - MÜSAHİBƏ

Azərbaycanın tanınmış hüquqşünası, sabiq baş prokuroru və Ədalət Partiyasının sədri İlyas İsmayılovun vəfatı partiyanın gələcəyi və siyasi fəaliyyəti ilə bağlı bir sıra sualları gündəmə gətirib. Bu suallar arasında Ədalət Partiyasının Siyasi Şurasının hansı qərarları qəbul edəcəyi və qurultayın nə vaxt olacağı, kimin sədr seçiləcəyi xüsusi diqqət çəkir. Qeyd edək ki, Partiyanın Siyasi Şurası və Mərkəzi Nəzarət Təftiş Komissiyasının birgə iclasında qurultayın keçirilməsi üçün müvafiq prosedurlar müzakirə olunub. Qurultayın keçirilməsi üçün müvafiq addımların atılması ilə bağlı Nizamnaməyə uyğun olaraq aprelin 19-da Ali Məclisin iclasının keçirilməsi barədə qərar qəbul olunub. Partiyanın qurultayının keçirilməsi tarixini Ali Məclis müəyyənləşdirəcək. Bu qurultayda partiyanın gələcək strategiyası və yeni sədr seçimi ilə bağlı məsələlərin müzakirəsi gözlənilir. Həmçinin, Siyasi Şuranın qəbul edəcəyi qərarlar partiyanın növbəti addımlarını və gələcək fəaliyyətini müəyyən edəcək.

Mövzu ilə bağlı Ədalət Paratiyasının sədr müavini, politoloq Mütəllim Rəhimli Crossmedia.az-a müsahibə verib.

-  Ədalət Partiyasının hazırkı durumu necədir?

-  Ədalət Partiyasının nizamnaməsinə görə, hər 4 ildən bir qurultay çağırılmalıdır. Son qurultayımızın 4 ili bu il, 14 mart tarixində tamam olub və nizamnaməyə uyğun olaraq həmin tarixdən etibarən qurultayın keçirilməsi tələb olunur. Lakin İlyas müəllimin vəfatı ilə əlaqədar olaraq, milli-mənəvi dəyərlərimizə hörmət əlaməti kimi onun qırx mərasimlərinin başa çatmasını gözlədik və qurultayı bundan sonra keçirməyi planlaşdırdıq. Təəssüf ki, partiyada müəyyən bir qrup nə Ali Məclisin, nə də partiya qurultayının keçirilməsinə razılaşmır. Onların arqumentləri isə gülüncdür. Belə fikir irəli sürürlər ki, partiyada çoxsaylı namizədlərin olduğunu və bu səbəbdən qurultayın yubadılmalı olduğunu iddia edirlər. Onlar vahid namizədin müəyyənləşdirilməsini və ya başqa bir fikir tapılmasını təklif edirlər. Bu isə demokratik dəyərlərin pozulması deməkdir. Biz qurultaya hörmətlə yanaşaraq bütün partiya üzvlərinə sədr seçmək imkanı yaratmalıyıq.

-  Siyasi Şuranın qərarları icra olunacaqmı? 

-  Bu fikir ayrılığı uzun müddətdir davam edir. Nəhayət, 12 aprel tarixində Siyasi Şuranın iclası keçirildi. Siyasi Şuranın 11 üzvündən 7-si iştirak etdi ki, bu da kvorumun mövcud olduğunu göstərir. İştirak edən 7 nəfərin hamısı Ali Məclisin keçirilməsi ilə bağlı qərar qəbul etdi və bu qərara imza atdı. Lakin hazırda sədrin səlahiyyətlərini icra edən Meydan Babayev Siyasi Şuranın bu qərarını tanımaq istəmir. Müxtəlif bəhanələr gətirərək, qərarın qanuni olmadığını iddia edir. Bu da partiya üzvləri tərəfindən pis qarşılanır. Belə bir iclasın keçirilməsinə qısqanclıq başa düşülən deyil. Ədalət Partiyasının Siyasi Şurası direktiv bir orqandır və onun qərarları icra olunmalıdır. 

19 aprel tarixində Ali Məclisin iclası keçiriləcək. Siyasi Şuranın qərarına görə, bu iclas həm onlayn, həm də Bakı şəhər təşkilatlarının canlı yığıncağı formasında olacaq. Əgər Ali Məclis üzvlərinin başqa təklifləri olmasa, iclasda iki əsas qərar qəbul ediləcək: qurultayın vaxtının müəyyənləşdirilməsi və qurultaya hazırlıq üçün təşkilat komitəsinin formalaşdırılması.

-  Bəs bu qərarları da əleyhinə çıxa bilərlərmi ? 

-  Məsələ bundadır ki, partiyanın bütün strukturları ölkədə ədalət mühakiməsinə tabe olur. Partiyanın daxilində bu ədaləti Mərkəzi Nəzarət və Təftiş Komissiyası təmin edir, yəni partiyadaxili fəaliyyətin nizamnaməyə uyğun olub-olmadığını yoxlayır. Ölkədə isə bu məsələlər məhkəmə instansiyaları tərəfindən yerinə yetirilir. Ədalət Partiyasında Mərkəzi Nəzarət və Təftiş Komissiyası prosedurların Ədalət Partiyasının nizamnaməsinə uyğun olduğunu göstərir. Əgər biz 4 il ərzində qurultayı keçirməsək və seçkili orqanlarla bağlı Ədliyyə Nazirliyinə müraciət etməsək, partiyanın hüquqi statusu şübhə altına düşə bilər. Ədalət Partiyasının qeydiyyatı ləğv oluna bilər. Təəssüf ki, əks tərəf bu məsələni nəzərə almır. Biz Ədalət Partiyasını sıfırdan yaratmışıq və hazırda 56 rayon təşkilatımızın 50-si qurultayın keçirilməsini dəstəkləyir. Lakin azlıq təşkil edən qrup bu prosesə mane olmağa çalışır. Azlıq çoxluğa tabe olmaq istəmir. Ortada belə bir sual yaranır ki, bu insanlar Ədalət Partiyasının qeydiyyatını ləğv etdirməyi mi düşünürlər və onların niyyəti nədən ibarətdir? Təbii ki, rayon təşkilatlarına müxtəlif yollarla təsir göstərərək, pozuculuq fəaliyyəti aparırlar. Daha çox doğru yoldan sapdırmağa çalışırlar ki, Ali Məclisin və qurultayın keçirilməsinə imkan verməsinlər. Amma bu, baş tutmayacaq. Çünki Ədalət Partiyasının rayon təşkilatları İlyas İsmayılovun zamanında və onun siyasi irsinə uyğun olaraq yaradılıb. Onlar Ədalət Partiyasının məramını, ideologiyasını çox yaxşı mənimsəyiblər. Bu siyasəti həyata keçirmək üçün əllərindən gələni edəcəklər.

-  Növbəti adımınız necə olacaq?

-  Əgər bir qrup bu prosesdə iştirak etmək istəmirsə, bu onların öz seçimidir. Amma mən dəfələrlə həmin qrupa müraciət etmişəm və bildirmişəm ki, gəlin əl-ələ verək və partiya quruculuğunda birgə iştirak edək. Yəni, Ali Məclisin keçirilməsi və partiya qurultayının keçirilməsi prosesini birgə idarə edək. Təəssüf ki, bu günə qədər onlardan heç bir cavab almamışam.  Ali Məclisin qərarına sədr veto qoya bilər. Hazırda sədr vəzifəsini icra edən Meydan Babayevdir və o  veto qoya bilər. Əgər veto qoyulsa və Ali Məclis yenidən iclas keçirib, qərarı üçdə iki səs çoxluğu ilə qəbul etsə, qərar icra olunmalıdır. Mexanizm məhz bundan ibarətdir. Bu da əks tərəfin addımlarına bağlıdır. Əgər veto qoyulacaqsa, təbii ki, Ali Məclis bir daha toplaşmalı və qərarı üçdə iki səs çoxluğu ilə qəbul etməlidir ki, qurultaya gedilsin. Qurultayla bağlı prosesdən bu insanlar Ədalət Partiyasını saxlaya bilməyəcəklər. Biz bu prosesə tam hazırıq. Əgər 50 rayon təşkilatı açıq şəkildə qurultayın keçirilməsini tələb edirsə, nəyə görə bir qrup insan aldadılaraq partiya əleyhinə yönəldilir? Təəssüf ki, bu adamlar partiyada paralel struktur yaratmağa və rayon təşkilatlarını bölməyə çalışırlar. Bu isə dağıdıcılıqdan başqa bir şey deyil.

-  Ədalət Partiyası parçalana bilərmi?

-  Ədalət Partiyası parçalana bilməz. Ədalət Partiyasından yalnız kiçik bir hissə qopa bilər. Mən parçalanma ilə bağlı heç bir gözlənti görmürəm. Parçalanma böyük bir hissənin ayrılması, yarı bölünməsi və ya üçdə birinin ayrılması deməkdir. Yalnız çox kiçik bir hissənin ayrılması mümkündür.

-  Sədrliyə iddialısınızmı? 

-  Bəli, Ədalət Partiyasının qurulmasında mən iştirak etmişəm. Rayon təşkilatları məni yaxşı tanıyırlar, mən də onları tanıyıram. Birgə mübarizə aparmışıq, birgə fəaliyyət göstərmişik, çətin anlarda məsləhətləşmişik, xoş anlarımızı paylaşmışıq. Onlar da uzun müddətdir mənə bu təklifi edirlər. Belə müzakirələr aparılıb ki, mən namizədliyimi irəli sürüm. Nəhayət, bu günlərdə onların da istəyini nəzərə alaraq birgə qərar qəbul etdik ki, Ədalət Partiyasının qurultayında mən namizədliyimi irəli sürüm. Ədalət Partiyasının perspektiv inkişafı, partiyanın ölkədə siyasi çəkisinin və nüfuzunun artması istiqamətində öz platformamı qurultay iştirakçılarına təqdim edəcəm. 

-  Şansınızı necə dəyərləndirirsiniz? 

-  Əgər partiyanın 56 rayon təşkilatından 50-sı mənim namizədliyimi irəli sürməyimi dəstəkləyirsə, hesab edirəm ki, onlar qurultayda da mənə səs verəcəklər. Amma təbii ki, mən indidən heç nə deyə bilmərəm. Hər şey qurultay nümayəndələrinin qərarından asılıdır. Bu, mənim ehtimalımdır. Qurultayda mənim platformamın üzvlərimizə və qurultay nümayəndələrinə təsiri hesab edirəm ki, əhəmiyyətli təsir göstərəcək.

Nəzrin Salmanova